നടന വിസ്‌മയം മോഹൻലാലിന് നിരവധി ആരാധകരാണ് ഉള്ളത്. സമൂഹ മാധ്യമങ്ങളിൽ പലപ്പോഴും താരത്തിനെ കാണാനുള്ള ആഗ്രഹം പങ്കുവെക്കുന്ന നിരവധി വിഡിയോകൾ വൈറലാകാറുണ്ട്. അതിൽ കഴിയുന്ന വിധം അദ്ദേഹം ഫോൺ ചെയ്ത്‌ അവരുടെ ആഗ്രഹം സാധിച്ചു നൽകാറുണ്ട്. ഇതുപോലെ തന്നെ കഴിഞ്ഞ ദിവസം മോഹൻലാലിന്റെ ഒരു ആരാധികയുടെ കരച്ചില്‍ വീഡിയോ സോഷ്യല്‍ മീഡിയയില്‍ വൈറലായിരുന്നു. ഇതിന് പിന്നാലെ നടൻ തന്നെ തന്റെ ആരാധികയായ രുക്മിണിയമ്മ എന്ന മുത്തശ്ശിയുടെ ആഗ്രഹം നിറവേറ്റി വീഡിയോ കോള്‍ ചെയ്തു.
മോഹൻലാലിനെ നേരിൽ കാണാനാകാത്തതിന്റെ സങ്കടം പറഞ്ഞു കൊണ്ട്കരയുന്ന രുക്മിണിയമ്മയുടെ വീഡിയോ മോഹന്‍ലാല്‍ ഫാന്‍സ് ക്ലബ് ഉള്‍പ്പടെ സമൂഹ മാധ്യമങ്ങളിൽ ഷെയർ ചെയ്‌തിരുന്നു. തുടർന്ന് രുക്മിണിയമ്മയുടെ കരച്ചിൽ കണ്ടതിനു ശേഷം മോഹന്‍ലാല്‍ അവരെ വിളിക്കുകയായിരുന്നു. “എന്തായിരുന്നു ഭയങ്കര കരച്ചിലൊക്കെ എന്ന് ചോദിച്ചുകൊണ്ടാണ് താരം സംസാരം ആരംഭിച്ചത്. കൊവിഡ് സാഹചര്യം മാറിയ ശേഷം നേരില്‍ കാണാമെന്ന ഉറപ്പ് നല്‍കിയ ശേഷമാണ് അദ്ദേഹം ഫോണ്‍വച്ചത്.”
അതേസമയം ഫോൺ വെയ്ക്കാൻ നേരത്ത് രുക്മിണിയമ്മയ്ക്ക് ഒരു ഉമ്മയും താരം നൽകി. മോഹന്‍ലാല്‍ ഫാന്‍സ് അസോസിയേഷന്‍ പ്രവര്‍ത്തകരാണ് ഇത്തരമൊരു വീഡിയോ കോളിന് അവസരമൊരുക്കിയത്. വീഡിയോ ഇപ്പോൾ വലിയ ജനശ്രദ്ധ നേടുകയാണ്.
