കൊച്ചി: ചാലക്കുടിയിൽ നിന്നുള്ള ലോക്‌സഭാംഗവും മുതിർന്ന കോൺഗ്രസ് നേതാവുമായ കെ.പി ധനപാലൻ (76) അന്തരിച്ചു. പറവൂരിലെ സ്വകാര്യ ആശുപത്രിയിലായിരുന്നു അന്ത്യം. ദീർഘകാലം എറണാകുളം ജില്ലാ കോൺഗ്രസ് കമ്മിറ്റിയുടെ (ഡി.സി.സി) പ്രസിഡന്റായി പ്രവർത്തിച്ചിട്ടുള്ള അദ്ദേഹം ജില്ലയിലെ കോൺഗ്രസ് പ്രസ്ഥാനത്തിന്റെ ശക്തനായ നേതാവായിരുന്നു. മുതിർന്ന നേതാവ് എ.കെ ആന്റണിയുടെ ഏറ്റവും അടുത്ത വിശ്വസ്തരിലൊരാളായാണ് കെ.പി ധനപാലൻ അറിയപ്പെട്ടിരുന്നത്.
2009-ൽ ചാലക്കുടി മണ്ഡലത്തിൽ നിന്നാണ് അദ്ദേഹം ലോക്‌സഭയിലേക്ക് തിരഞ്ഞെടുക്കപ്പെട്ടത്. തുടർന്ന് 2014-ൽ തൃശ്ശൂർ മണ്ഡലത്തിൽ നിന്ന് വീണ്ടും ലോക്‌സഭയിലേക്ക് മത്സരിച്ചെങ്കിലും പരാജയപ്പെട്ടു. പാർലമെന്ററി രംഗത്തിന് പുറമെ സഹകരണ-ബാങ്കിങ് മേഖലകളിലും അദ്ദേഹം സജീവമായിരുന്നു. പറവൂർ നഗരസഭാംഗം, മിൽമ ചെയർമാൻ, നോർത്ത് മലബാർ ഗ്രാമീൺ ബാങ്ക് ഡയറക്ടർ ബോർഡ് അംഗം എന്നീ നിലകളിൽ അദ്ദേഹം മികച്ച പ്രവർത്തനം കാഴ്ചവെച്ചു.
2001-ലെ നിയമസഭാ തിരഞ്ഞെടുപ്പിൽ വടക്കേക്കര മണ്ഡലത്തിൽ കെ.പി ധനപാലനെ സ്ഥാനാർത്ഥിയായി നിശ്ചയിക്കുകയും അദ്ദേഹം പ്രചാരണം ആരംഭിക്കുകയും ചെയ്തിരുന്നുവെങ്കിലും, പാർട്ടി തീരുമാനത്തെ തുടർന്ന് പിന്നീട് മത്സരരംഗത്തുനിന്ന് പിന്മാറേണ്ടി വന്നിട്ടുണ്ട്.
മുതിർന്ന കോൺഗ്രസ് നേതാവും മുൻ എം.പിയുമായ കെ.പി ധനപാലൻ അന്തരിച്ചു
