തിരുവനന്തപുരം: എസ് എഫ് ഐയെ തകർക്കാൻ ആർ എസ് എസ് ശ്രമിക്കുന്നുവെന്ന് എസ് എഫ് ഐ സംസ്ഥാന നേതാക്കള്‍. എസ് എഫ് ഐയുടെ സംസ്ഥാന സെക്രട്ടറി സച്ചിൻദേവ്, പ്രസിഡന്‍റ് വി വിനീഷ് എന്നിവർ നടത്തിയ വാർത്താ സമ്മേളനത്തിലാണ് ആര്‍ എസ് എസിനെതിരെ ആരോപണം ഉന്നയിച്ചത്.
നവമാദ്ധ്യങ്ങളെ ഉപയോഗിച്ച് എസ് എഫ് ഐക്കെതിരെ വ്യാജവാർത്തകൾ പ്രചരിപ്പിക്കുകയാണ്. എല്ലാ വെല്ലുവിളികളും എസ് എഫ് ഐ നേരിടും. സംഘടനയിലെ ചിലർ ചെയ്യുന്ന തെറ്റിനെ ന്യായീകരിക്കുന്നില്ല. അവർ നടപടി നേരിടുക തന്നെ വേണം. അതിൽ ഒരു വിട്ടു വീഴ്‌ചയ്‌ക്കും എസ് എഫ് ഐ തയ്യാറല്ല. എന്നും സച്ചിന്‍ ദേവ് വ്യക്തമാക്കി.
സംഘർഷത്തിനുശേഷം യൂണിയൻ റൂമിൽ ഇല്ലാതിരുന്ന വസ്തുക്കളാണു പിന്നെ കണ്ടെടുത്തത്. ഇതിൽ അന്വേഷണം വേണം. ഇതിനായി എസ്എഫ്ഐ നിയമനടപടി സ്വീകരിക്കും. രാഷ്‌ട്രീയമായി കീഴ്‌പ്പെടുത്താമെന്നാണ് വിചാരമെങ്കില്‍ അതിനെ രാഷ്‌ട്രീയമായി തന്നെ നേരിടും, ഇതിനായി ക്യാമ്പസുകൾ തോറും വിദ്യാർത്ഥികളെ അണിനിരത്തും. ക്യാമ്പസിലെ എല്ലാ കാര്യങ്ങളും നിയന്ത്രിക്കാൻ നേതൃത്വത്തിന് കഴിയില്ല, അത് യൂണിറ്റ് കമ്മിറ്റിയാണ് ചെയ്യുന്നതെന്നും സച്ചിൻ വ്യക്തമാക്കി.
