കൊട്ടാരക്കര : സോളര് കമ്മിഷന് മുന്നില് പരാതിക്കാരി ഹാജരാക്കിയ കത്തില് കൃത്രിമത്വം നടത്തിയെന്ന ഹര്ജിയില് പത്തനാപുരം എംഎൽഎ കെ.ബി.ഗണേഷ് കുമാറിനോട് നേരിട്ട് ഹാജരാകാൻ കൊട്ടാരക്കര ഒന്നാം ക്ലാസ് ജുഡീഷ്യല് മജിസ്ട്രേട്ട് കോടതി നിർദേശിച്ചു. പരാതിക്കാരിക്കു വീണ്ടും സമന്സ് അയയ്ക്കും. അടുത്ത മാസം 18-ന് ഹാജരാകണമെന്നാണ് ഗണേഷിനോട് കോടതി നിര്ദേശിച്ചിരിക്കുന്നത്. ഹര്ജിക്ക് എതിരെ നേരത്തെ ഉണ്ടായിരുന്ന ഹൈക്കോടതിയുടെ സ്റ്റേ അവസാനിച്ച സാഹചര്യത്തിലാണ് വിഷയം വീണ്ടും കോടതി പരിഗണിച്ചത്. സമന്സ് റദ്ദാക്കണമെന്ന് ആവശ്യപ്പെട്ട് കെ.ബി.ഗണേഷ്കുമാറും പരാതിക്കാരിയും ഹൈക്കോടതിയെ സമീപിച്ചതോടെയാണ് തുടര് നടപടികള് ഹൈക്കോടതി താല്ക്കാലികമായി സ്റ്റേ ചെയ്തത്. അതേസമയം ഗണേഷ് കുമാറും പരാതിക്കാരിയും ഇന്ന് കോടതിയിൽ ഹാജരായിരുന്നില്ല.
നേരെത്തെ പരാതിയില് കഴമ്പുണ്ടെന്ന് കണ്ടെത്തിയ കൊട്ടാരക്കര കോടതി പ്രതികള്ക്കെതിരെ കേസ് എടുത്തിരുന്നു . ജയില് സൂപ്രണ്ടിന്റെ റിപ്പോര്ട്ട് അടക്കം തെളിവുകള് വാദി ഭാഗം കോടതിയില് ഹാജരാക്കിയിരുന്നു. മുന് മുഖ്യമന്ത്രി ഉമ്മന് ചാണ്ടി അടക്കം 14 പേര് മൊഴി നല്കി. പത്തനംതിട്ട ജയിലില് വച്ച് എഴുതിയ കത്തില് 21 പേജ് ഉണ്ടായിരുന്നെന്നും പിന്നീട് നാല് പേജ് കൂട്ടി ചേര്ത്ത് 25 പേജാക്കിയാണ് ജുഡീഷ്യല് കമ്മിഷന് നല്കിയതെന്നും നടപടിക്ക് പിന്നില് ഗൂഢാലോചനയുണ്ടെന്നും കാട്ടി അഡ്വ. സുധീര് ജേക്കബ്, അഡ്വ.ജോളി അലക്സ് മുഖേന ഫയല് ചെയ്തതാണ് കേസ്.