ദില്ലി: ഗോധ്ര കൂട്ടക്കൊലയുടെ ഞെട്ടിക്കുന്ന യാഥാർഥ്യങ്ങൾ പ്രമേയമാക്കിയ ചിത്രം ‘ദി സബർമതി റിപ്പോർട്ട്’ ന്റെ പ്രദർശനത്തിടെ ജെ എൻ യു വിൽ വിദ്യാർത്ഥികൾക്ക് നേരെ ആക്രമണം. എ ബി വി പി യാണ് പ്രദർശനം സംഘടിപ്പിച്ചത്. പുറത്തു നിന്നെത്തിയവർ ചിത്രം കണ്ടുകൊണ്ടിരുന്ന വിദ്യാർത്ഥികൾക്ക് നേരെ കല്ലെറിയുകയായിരുന്നു. ഏതാനും ചില വിദ്യാർത്ഥികൾക്ക് പരിക്കേറ്റതായും സംഘാടകർ അറിയിച്ചു. ആക്രമണത്തെ തുടർന്ന് പ്രദർശനം കുറച്ചു സമയത്തേക്ക് നിർത്തിവയ്‌ക്കേണ്ടിവന്നു. എങ്കിലും അൽപ്പസമയത്തിനകം പുനരാരംഭിച്ചു.
സർവ്വകലാശാലയിലെ അഭിപ്രായ സ്വാതന്ത്ര്യത്തിനും ജനാധിപത്യ മൂല്യങ്ങൾക്കും നേരെയുള്ള കടന്നാക്രമണമാണ് നടന്നതെന്ന് എബിവിപി പ്രതികരിച്ചു. ജെ എൻ യുവിലെ ഇടത്, രാജ്യവിരുദ്ധ സംഘടനകളാണ് ആക്രമണങ്ങൾക്ക് പിന്നിലെന്നും സംഘടന ആരോപിച്ചു. അയോദ്ധ്യയിൽ നിന്ന് ഗുജറാത്തിലേക്ക് കർസേവകരുമായി പോയ സബർമതി എക്സ്‌പ്രസ് ഗോധ്ര റെയിൽവേ സ്റ്റേഷനിലെത്തിയപ്പോൾ അക്രമാസക്തരായ ജനക്കൂട്ടം ആക്രമിക്കുകയായിരുന്നു. കനത്ത കല്ലേറ് നടത്തിയശേഷം ട്രെയിനിനുള്ളിൽ കയറിയ അക്രമികൾ നാല് ബോഗികൾ പെട്രോൾ ഒഴിച്ച് കത്തിച്ചു. സ്ത്രീകളും കുട്ടികളും അടങ്ങുന്ന 59 ശ്രീരാമ ഭക്തരാണ് തീവണ്ടിക്കുള്ളിൽ വെന്തുമരിച്ചത്.
