വെള്ളറട: സ്കൂള്‍ ബസും അമിതവേഗത്തില്‍ വന്ന ബൈക്കും കൂട്ടിയിടിച്ചുണ്ടായ അപകടത്തിൽ ബൈക്ക് യാത്രക്കാർക്ക് ഗുരുതര പരിക്ക്. തമിഴ്നാട് കൊളവിള സ്വദേശികളാണ് അപകടത്തിൽപ്പെട്ടത്. കഴിഞ്ഞ ദിവസം വൈകുന്നേരം 4.45-ഓടെ കലുങ്ക് നട ജംഗ്ഷന് സമീപമായിരുന്നു അപകടമുണ്ടായത്.
വെള്ളറടയിലേക്ക് വരികയായിരുന്ന മാര്‍ ബസേലിയോസ് സ്കൂള്‍ വാനില്‍ വെള്ളറടയില്‍ നിന്ന് പനച്ചമൂട്ടിലേക്ക് പോവുകയായിരുന്ന ബൈക്ക് ഇടിച്ചു കയറുകയായിരുന്നു. അമിത വേഗത്തില്‍ ബൈക്ക് വരുന്നതു കണ്ട് സ്കൂള്‍ ബസ് ബ്രേക്കിട്ടു നിര്‍ത്തി. എന്നാൽ, എതിരെ നിന്നു വരികയായിരുന്ന ബൈക്ക് നിർത്താൻ ശ്രമിച്ചെങ്കിലും വളരെ ദൂരം നിരങ്ങിപ്പോയശേഷം സ്കൂള്‍ ബസിന്‍റെ അടിയില്‍ അകപ്പെടുകയായിരുന്നു.
അപകടത്തില്‍പ്പെട്ട ഇരു വാഹനങ്ങളും പോലീസ് കസ്റ്റഡിയില്‍ എടുത്തു. ഗുരുതര പരിക്കേറ്റ ബൈക്ക് യാത്രക്കാരായ രണ്ടുപേരെയും കാരക്കോണം സിഎസ്ഐ മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു.
ഒരാളുടെ തലയ്ക്ക് ക്ഷതമേറ്റിട്ടുണ്ട്. ഒരു യാത്രക്കാരന്‍റെ കാലിനു പൊട്ടൽ സംഭവിച്ചിട്ടുള്ളതായി വെള്ളറട പോലീസ് പറഞ്ഞു.
