തിരുവനന്തപുരം: ഭക്തർക്ക് സുഗമമായ ദർശന സൗകര്യം ഒരുക്കാൻ ശ്രീ പത്മനാഭ സ്വാമി ക്ഷേത്രം ഒരുങ്ങുന്നു. ക്ഷേത്രത്തിൽ ചിങ്ങം ഒന്ന് മുതൽ ദർശനക്രമത്തിൽ അടിമുടി മാറ്റം. ദർശനക്രമം വഴി ഭക്തർക്ക് പ്രദക്ഷിണം പൂർണ്ണമാക്കാൻ സാധ്യമല്ലാത്തതിനാലും, ഭക്തർക്ക് കൂടുതൽ സുഗമമായ ദർശന സൗകര്യം ഏർപ്പെടുത്തുന്നതിനുമാണ് പുതിയ ദർശന ക്രമത്തിന് ക്ഷേത്ര ഭരണസമിതി തീരുമാനിച്ചത്. തെക്ക് ഭാഗത്ത് കുലശേഖരമണ്ഡപത്തിന് അരികിലൂടെ അകത്തെ കിഴക്കേ നടയിൽ പ്രവേശിച്ച് നരസിംഹ മൂർത്തിയെ വണങ്ങി ഭഗവാന്റെ ശിരസ്സ് ഭാഗത്ത് കൂടി ഒറ്റക്കൽ മണ്ഡപത്തിൽ പ്രവേശിച്ച് പാദഭാഗത്ത് കൂടി തൊഴുതിറങ്ങുന്നതാണ് നിലവിലെ രീതി
കിഴക്ക് ഭാഗത്ത് നിന്നും വരുന്ന പൊതുവായ ക്യു ആലുവിളക്ക് ചുറ്റി വടക്ക് ഭാഗത്ത് കൂടി പ്രവേശിച്ച് ശ്രീരാമ ദേവനെ തൊഴുത് വിഷ്വക് സേന മൂർത്തിയുടെ മുന്നിലൂടെ ഭഗവാന്റെ പാദഭാഗത്ത് ഒറ്റക്കൽ മണ്ഡപത്തിൽ പ്രവേശിച്ച് ശിരസ്സ് ഭാഗം വണങ്ങി പടികെട്ടിറങ്ങി നരസിംഹ മൂർത്തിയെ തൊഴുത് ശ്രീകോവിലിന് പിന്നിലൂടെ പ്രദക്ഷിണമായി വടക്കേ നടവഴി പുറത്തിറങ്ങുന്നതാവും പുതിയ ദർശന ക്രമം.
