തിരുവനന്തപുരം : ഇന്നു മുതല് എസ്എസ്എല്സി, ഹയര് സെക്കന്ഡറി, വിഎച്ച്എസ്ഇ പരീക്ഷകള് തുടങ്ങി. പതിമൂന്നര ലക്ഷത്തിലധികം വിദ്യാര്ത്ഥികളാണ് ഇത്തവണ പൊതുപരീക്ഷകള് എഴുതുന്നത്.
സംസ്ഥാനത്ത് കൊവിഡ് 19 രോഗം വീണ്ടും റിപ്പോര്ട്ട് ചെയ്ത പശ്ചാത്തലത്തില് കനത്ത ജാഗ്രതയിലാണ് പരീക്ഷ നടത്തുന്നത്. നിരീക്ഷണത്തിലുളള വിദ്യാര്ത്ഥികള്ക്ക് പിന്നീട് സേ പരീക്ഷ നടത്തും. പരീക്ഷാ നടത്തിപ്പിനു തടസ്സമാകും വിധം വിദ്യാര്ഥികള്ക്കു കൊറോണ വൈറസ് ബാധ റിപ്പോര്ട്ട് ചെയ്തിട്ടില്ലെന്നു പൊതു വിദ്യാഭ്യാസ ഡയറക്ടര് കെ.ജീവന്ബാബു അറിയിച്ചു. ആദ്യമായാണ് 3 പരീക്ഷകളും രാവിലെ ഒരേ സമയത്തു നടക്കുന്നത്.
എസ്എസ്എല്സി പരീക്ഷയ്ക്ക് സംസ്ഥാനത്തെ 2945 പരീക്ഷ കേന്ദ്രങ്ങളുണ്ട്. യുഎഇയില് ഒമ്പത് കേന്ദ്രങ്ങളും ഒരുക്കിയിട്ടുണ്ട്. കോവിഡ് രോഗം സ്ഥിരീകരിച്ച സാഹചര്യത്തില് പത്തനംതിട്ട, കോട്ടയം, എറണാകുളം ജില്ലകളില് കൂടുതല് ജാഗ്രതയുണ്ട്.
രോഗം റിപ്പോര്ട്ട് ചെയ്ത ജില്ലകളില് പ്രത്യേകം ജാഗ്രത പാലിക്കും. ഒന്പതാം ക്ലാസ് വരെയുള്ള പരീക്ഷകള് ഒഴിവാക്കുന്ന കാര്യത്തില് ഇന്നു തീരുമാനം ഉണ്ടാകുമെന്നു മന്ത്രി കെ കെ ശൈലജ അറിയിച്ചു. ഇക്കാര്യത്തില് മന്ത്രി സി രവീന്ദ്രനാഥുമായി ഇന്നലെ ചര്ച്ച നടത്തി.
