കൊല്ലം: ആളൊഴിഞ്ഞ പുരയിടത്തിൽ കത്തിക്കരിഞ്ഞ നിലയിൽ തെരുവ് നായയുടെ ജഡം കണ്ടെത്തി.
ജീവനോടെ കത്തിച്ചതെന്നാണ് സംശയം. കൊല്ലം പുള്ളിക്കടയിലായിരുന്നു സംഭവം. ഉണങ്ങിയ ഓലകള് കൂട്ടിയിട്ട് കത്തിച്ച നിലയിലാണ് നായയുടെ ജഡം കണ്ടെത്തിയത്. മുതുകിലും കാലിലും മുറിവേറ്റ് പുഴുവരിച്ച നിലയില് ഈ നായയെ നേരത്തെ കണ്ടതായി നാട്ടുകാര് പറഞ്ഞു.
സംഭവത്തില്, കൊല്ലം ഈസ്റ്റ് പൊലീസ് കേസെടുത്ത് അന്വേഷണം ആരംഭിച്ചു. മൃഗസംരക്ഷണ വകുപ്പും അന്വേഷണം നടത്തുമെന്ന് വ്യക്തമാക്കിയിട്ടുണ്ട്.
അതേസമയം, സംസ്ഥാനത്ത് തെരുവുനായ ആക്രമണം രൂക്ഷമായി തുടരുകയാണ്. കുന്നത്തൂരില് തെരുവുനായ ആക്രമണത്തില് ആയുര്വേദ ഡോക്ടര്ക്ക് പരുക്കേറ്റു. നെല്ലിമുഗള് സ്വദേശി ഡോ. ലിബിനാണ് ആക്രമണത്തില് പരുക്കേറ്റത്.
ഡോക്ടറുടെ വലതു കൈപ്പത്തിക്കാണ് പരുക്കേറ്റത്. ആശുപത്രിയില് നിന്ന് വീട്ടിലേക്ക് മടങ്ങവെയാണ് സംഭവം. പരുക്കേറ്റ ലിബിന് പത്തനംതിട്ട ജനറല് ആശുപത്രിയില് ചികിത്സ തേടി.