ഉദയനാപുരം: തെരുവുനായയുടെ ആക്രമണത്തിൽ വിദ്യാർത്ഥിക്കും വയോധികനും പരിക്കേറ്റു. ഉദയനാപുരം ഇത്തിപ്പുഴ പാലത്തിനു സമീപം താമസിക്കുന്ന കുറ്റിവേലിൽ സജേഷിന്‍റെ മകൻ അജയകൃഷ്ണ (14), വയോധികനായ അമ്പാടി എന്നിവർക്കാണ് പരിക്കേറ്റത്. ഞായറാഴ്ച വൈകുന്നേരം ആണ് ആക്രമണമുണ്ടായത്. വീടിനു മുന്നിൽ നിൽക്കുമ്പോഴാണ് അജയകൃഷ്ണയെ നായ പാഞ്ഞെത്തി കടിച്ചത്. നായയെ ഇതുവരെ പിടികൂടാനായില്ല. അമ്പാടി കോട്ടയം മെഡിക്കൽ കോളേജിൽ ചികിത്സയിലാണ്.
അതേസമയം, രണ്ടുപേരെ ആക്രമിച്ചു പരിക്കേൽപിച്ചശേഷം തെരുവുനായ കടന്നുകളഞ്ഞ സംഭവമുണ്ടായിട്ടും പഞ്ചായത്ത് ആരോഗ്യ വകുപ്പ് അധികൃതർ വിവരമന്വേഷിക്കുകയോ തെരുനായയെ പിടികൂടുന്നതിന് നടപടി സ്വീകരിക്കുകയോ ചെയ്തില്ലെന്ന് നാട്ടുകാർ ആരോപിക്കുന്നു.
