ചെന്നൈ: തമിഴ് നടന് വിജയിയെ അറസ്റ്റ് ചെയ്തേക്കുമെന്ന് സൂചന. താരത്തെ ചോദ്യം ചെയ്യുന്നത് 17 മണിക്കൂര് പിന്നിട്ട സാഹചര്യത്തിലാണ് നടപടി അറസ്റ്റിലേക്ക് നീളുമെന്ന സൂചനകള് പുറത്തുവരുന്നത്.
സിനിമ ബിഗിലുമായി ബന്ധപ്പെട്ട കണക്കുകളില് വൈരുദ്ധ്യമെന്ന് ആദായനികുതി വകുപ്പ്. നിര്മ്മാതാക്കളുടെ കണക്കും വിജയിയുടെ പക്കലുള്ള രേഖകളും തമ്മില് വൈരുദ്ധ്യമെന്നാണ് ആദാനയനികുതി വകുപ്പ് പറയുന്നത്.
കടലൂരിലെ മാസ്റ്റേസ് സിനിമയുടെ ഷൂട്ടിങ്ങ് ലൊക്കേഷനില് എത്തിയാണ് സമന്സ് ഉദ്യോഗസ്ഥര് വിജയിയ്ക്ക് കൈമാറിയത്. ചോദ്യം ചെയ്യലിന് സഹകരിക്കാമെന്ന് അറിയിച്ച വിജയിയെ, ആദായ നികുതി വകുപ്പ് ഉദ്യോഗസ്ഥര് കാറില്കയറ്റി കൊണ്ടുപോയി. ബിഗില് സിനിമയുടെ നിര്മ്മാതാക്കളായ എജിഎസ് ഫിലിംസിന്റെ പണമിടപാടുമായി ബന്ധപ്പെട്ടാണ് ചോദ്യം ചെയ്യല്.
ആദായ നികുതി റിട്ടേണ് സമര്പ്പിച്ചതില് ക്രമക്കേടുണ്ടോയെന്നും പരിശോധിക്കുന്നു. എജിഎസ് ഫിലിംസിന്റെ ചെന്നൈയില് ഉള്പ്പടെയുള്ള ഓഫീസുകളില് കഴിഞ്ഞ ദിവസം ആദായ നികുതി വകുപ്പ് റെയ്ഡ് നടത്തിയിരുന്നു.
ഇതിന്റെ തുടര്ച്ചയായി നടപടിയെന്നാണ് വിശദീകരണം. വിജയിയെ കസ്റ്റഡിയിലെടുത്തതിന് പിന്നാലെ മാസ്റ്റേഴ്സിന്റെ ഷൂട്ടിങ്ങ് തല്ക്കാലത്തേക്ക് നിര്ത്തിവച്ചു. ചെന്നൈ സാലിഗ്രാമത്തിലെ വിജയിയുടെ വസതിയിലും ആദായനികുതി വകുപ്പ് പരിശോധന നടത്തി.