ദില്ലി : സാങ്കേതിക തകരാർ മൂലം എയർ ഇന്ത്യ വിമാനത്തിന് സ്വീഡനിൽ അടിയന്തര ലാൻഡിംഗ്. ഇന്ധന ചോർച്ചയെ തുടർന്നാണ് എയർ ഇന്ത്യ വിമാനം സ്വീഡനിലെ സ്റ്റോക്ഹോം വിമാനത്താവളത്തിൽ ഇറക്കിയത്. മുന്നൂറിലധികം യാത്രക്കാരുമായി ന്യൂയോർക്കിൽ നിന്ന് ഡൽഹിയിലേക്ക് പറന്ന എയർ ഇന്ത്യയുടെ 777-300ഇആർ വിമാനമാണ് സ്വീഡനിൽ അടിയന്തര ലാൻഡിംഗ് നടത്തിയത്.
വിമാനത്തിലുണ്ടായിരുന്ന എല്ലാ യാത്രക്കാരും സുരക്ഷിതരാണെന്ന് എയർ ഇന്ത്യ അറിയിച്ചു. വിമാനം സുരക്ഷിതമായി സ്റ്റോക്ഹോം വിമാനത്താവളത്തിൽ ഇറക്കിയതായി ഡയറക്ടർ ജനറൽ ഓഫ് സിവിൽ ഏവിയേഷൻ ഉദ്യോഗസ്ഥൻ വ്യക്തമാക്കി. വിമാനത്തിന്റെ തകരാർ പരിശോധിക്കുകയാണെന്ന് അറിയിച്ചിട്ടുണ്ട്.