കൊല്ലം : എൻഎസ്എസ് ജനറൽ സെക്രട്ടറി പുറത്തിറക്കിയ സർക്കുലർ എൻഎസ്എസ് നടപ്പിലാക്കുമെന്നും അക്കാര്യത്തിൽ തർക്കമൊന്നുമില്ലെന്നും എംഎൽഎയും എൻഎസ്എസ് ഡയറക്ടർ ബോർ‍ഡ് അംഗവുമായ കെ.ബി.ഗണേഷ് കുമാർ വ്യക്തമാക്കി.സ്പീക്കർ എ.എൻ.ഷംസീറിന്റെ പ്രസ്താവനയിൽ പ്രതിഷേധിച്ചു വിശ്വാസ സംരക്ഷണ ദിനം ആചരിക്കണമെന്ന എൻഎസ്എസ് ജനറൽ സെക്രട്ടറിയുടെ സർക്കുലറിനെക്കുറിച്ചുള്ള ചോദ്യത്തോടായിരുന്നു ഗണേഷ് കുമാറിന്റെ പ്രതികരണം.
‘‘എൻഎസ്എസ് ജനറൽ സെക്രട്ടറി പുറത്തിറക്കിയ സർക്കുലർ, എൻഎസ്എസ് നടപ്പിലാക്കും, അതിലെന്താണ് തർക്കം. എൻഎസ്എസ് ജനറൽ സെക്രട്ടറി പറയുന്നതാണു കരയോഗങ്ങളും താലൂക്കു യൂണിയനുകളും അനുസരിക്കേണ്ടത്. ജനറൽ സെക്രട്ടറി പറയുന്ന കാര്യങ്ങൾ അനുസരിക്കാന്‍ എൻഎസ്എസ് ഇൻസ്പെക്ടർമാരും സെക്രട്ടറിമാരും കരയോഗം പ്രസിഡന്റുമാരും പ്രതിജ്ഞാബദ്ധമാണ്, അവരത് ചെയ്യും’’–ഗണേഷ് കുമാർ പറഞ്ഞു .
വിവാദ പരാമർശം നടത്തിയ നിയമസഭാ സ്പീക്കർ എ.എൻ.ഷംസീറിനെതിരെയുള്ള പ്രതിഷേധത്തിന്റെ ഭാഗമായി നാളെ വിശ്വാസ സംരക്ഷണദിനമായി ആചരിക്കുന്നതിനു എല്ലാ താലൂക്കു യൂണിനുകൾക്കും ജനറൽ സെക്രട്ടറി ജി.സുകുമാരൻ നായർ അയച്ച സർക്കുലറിലൂടെയാണ് എൻഎസ്എസ് നിർദേശം നൽകിയത്. എൻഎസ്എസ് പ്രവര്‍ത്തകരും വിശ്വാസികളുമായിട്ടുള്ളവര്‍ രാവിലെതന്നെ അവരവരുടെ വീടിനടുത്തുള്ള ഗണപതി ക്ഷേത്രത്തില്‍ എത്തി വഴിപാടുകള്‍ നടത്തണമെന്നാണു സർക്കുലറിൽ പറയുന്നത്.
