ഏറ്റുമാനൂര്: വീട്ടമ്മയുടെ വീട്ടില് യുവാവിനെ മരിച്ച നിലയിൽ കണ്ടെത്തിയ സംഭവത്തിൽ പ്രതികരണവുമായി കുടുംബം. കോട്ടയം വയലാ സ്വദേശി അരവിന്ദിന്റെ മരണത്തില് വിശദമായ അന്വേഷണം ആവശ്യപ്പെട്ട് വീട്ടുകാര് പോലീസില് പരാതി നല്കി. അരവിന്ദിന്റെ തലയിലും ശരീരത്തിലും കണ്ട മുറിവുകളാണ് ബന്ധുക്കളുടെ സംശയത്തിന്റെ അടിസ്ഥാനം. തലയ്ക്ക് പിന്നിലെ മുറിവാണ് മരണകാരണമായതെന്ന വിവരമാണ് ഡോക്ടര്മാരില് നിന്ന് ബന്ധുക്കള്ക്ക് കിട്ടിയിട്ടുള്ളത്. മറ്റ് സാഹചര്യങ്ങളെല്ലാം ചേര്ത്തു വയ്ക്കുമ്പോള് അരവിന്ദനെ മനപൂര്വം തലയ്ക്കടിച്ചു കൊന്നെന്ന സംശയമാണ് ബന്ധുക്കള് പങ്കുവയ്ക്കുന്നത്. ബോധം കെട്ടു കിടന്ന അരവിന്ദനെ ആശുപത്രിയിലാക്കാന് ഏറ്റുമാനൂരില് നിന്നൊരു വാഹനം വിളിക്കാന് വീട്ടമ്മ തയാറായിരുന്നില്ല.
പകരം പത്തു കിലോ മീറ്റര് അകലെയുളള വയലായില് നിന്ന് അരവിന്ദന്റെ പരിചയക്കാരനായ ഓട്ടോറിക്ഷക്കാരനെ വിളിച്ചു വരുത്തിയ ശേഷം മണിക്കൂറുകള് വൈകി ആശുപത്രിയിലെത്തിച്ചതാണ് മരണത്തില് സംശയം തോന്നാനുള്ള ഒന്നാമത്തെ സംശയം. അരവിന്ദന്റെ തലയുടെ പിന്നിലെ മുറിവും ശരീരമാസകലം കണ്ട മറ്റ് പരിക്കുകളുമാണ് മരണത്തില് ദുരൂഹത സംശയിക്കാനുളള രണ്ടാമത്തെ കാരണം.ആരോപണ വിധേയയായ വീട്ടമ്മയുടെ സഹോദരനൊപ്പമാണ് അരവിന്ദനെ ആശുപത്രിയിലെത്തിച്ചത്. എന്നാല് ആശുപത്രിയില് തെറ്റായ മേല്വിലാസം നല്കിയ ശേഷം വീട്ടമ്മയുടെ സഹോദരന് മുങ്ങിയതും കാര്യങ്ങള് സങ്കീര്ണമാക്കി. കൂടെ ആരും ഇല്ലാതിരുന്നതിനാല് തന്നെ അരവിന്ദന്റെ ചികില്സ മണിക്കൂറുകള് വൈകിയാണ് തുടങ്ങിയത്.