തിരുവനന്തപുരം: കിന്ഫ്ര പാര്ക്കിലെ മരുന്നുസംഭരണശാലയിലെ തീപിടിത്തത്തില് അട്ടിമറി സംശയിക്കുന്നില്ലെന്ന് മെഡിക്കല് സര്വീസ് കോര്പ്പറേഷന്. കൊല്ലത്തെ തീപിടിത്തത്തിന് ശേഷം ബ്ലീച്ചിങ് പൗഡര് മാറ്റിവെക്കാന് നിര്ദ്ദേശം നല്കിയിരുന്നു. നിലവില് തീയെല്ലാം അണച്ചിട്ടുണ്ട്. ഏകദേശം ഒരുകോടി രൂപയുടെ കെമിക്കല്സ് ആണ് സൂക്ഷിച്ചിരുന്നത്. മറ്റു മരുന്നുകളില് നിന്നും മാറ്റിയാണ് അതു വെച്ചിരുന്നത്. വിശദമായ പരിശോധനകളും ഫോറന്സിക് പരിശോധനകളും നടത്തി തീപിടിത്തത്തിന്റെ കാരണം കണ്ടുപിടിക്കുമെന്ന് മെഡിക്കല് സര്വീസ് കോര്പ്പറേഷന് എം ഡി ജീവന്ബാബു പറഞ്ഞു.
തിരുവനന്തപുരം ജില്ലയിലെ മെഡിക്കല് സര്വീസ് കോര്പ്പറേഷന് ഗോഡൗണുകളില് അടിയന്തര പരിശോധനകള് നടത്തുമെന്ന് ജില്ലാകലക്ടര് ജെറോമിക് ജോര്ജ് പറഞ്ഞു. അപകടത്തിന്റെ കാരണം കണ്ടെത്തും. കെട്ടിടത്തിലെ താപനില വളരെയധികം ഉയര്ന്നതാകാം ബീം തകര്ന്നു വീഴാന് കാരണമെന്നാണ് സംശയിക്കുന്നത്. ബ്ലീച്ചിങ് പൗഡറിന്റെ സാംപിള് കെമിക്കല് ലബോറട്ടറിയില് പരിശോധന നടത്തുമെന്നും ജില്ലാ കലക്ടര് അറിയിച്ചു.

