മക്കളുടെ മുഖം കാണുന്ന ചിത്രങ്ങള്‍ ആദ്യമായി സോഷ്യല്‍ മീഡിയയിലൂടെ പങ്കുവച്ച് ഗായിക ചിന്മയി ശ്രീപദ. ഇരട്ടക്കുട്ടികളാണ് ചിന്മയിക്കുള്ളത്.
ഇരട്ടക്കുട്ടികള്‍ക്ക് ഒരു വയസ് പൂര്‍ത്തിയായതിന് പിന്നാലെയാണ് ചിന്മയി ചിത്രങ്ങള്‍ ഇന്‍സ്റ്റഗ്രാമില്‍ പങ്കുവച്ചിരിക്കുന്നത്.
കുട്ടികൾ വീഡിയോ കോളിലുള്ള അച്ഛനെ കൗതുകത്തോടെ നോക്കുന്നതും കുസൃതി കാണിക്കുന്നതുമെല്ലാം ചിത്രങ്ങളിൽ കാണാം. ഏറ്റവും വലിയ അനുഗ്രഹം എന്ന അടിക്കുറിപ്പോടെയാണ്‌ താരം ചിത്രങ്ങള്‍ ഇൻസ്റ്റഗ്രാമിൽ പോസ്റ്റ് ചെയ്തത്. ചിത്രത്തിന് താഴെ നിരവധി പേരാണ് കുഞ്ഞുങ്ങള്‍ക്ക് ആശംസ നേർന്നുകൊണ്ട് രംഗത്തെത്തുന്നത്.
ദ്രിപ്ത, ഷര്‍വാസ് എന്നിങ്ങനെയാണ് മക്കളുടെ പേര്. നടനും സംവിധായകനുമായ രാഹുല്‍ രവീന്ദ്രനാണ് ചിന്മയിയുടെ ഭര്‍ത്താവ്. 2014- ലായിരുന്നു ചിന്മയിയും രാഹുല്‍ രവീന്ദ്രനും വിവാഹിതരായത്. തമിഴ്, തെലുങ്ക് ഭാഷകളിലായി നിരവധി ഗാനങ്ങളാണ് ചിന്മയി ആലപിച്ചിട്ടുള്ളത്. ഡബ്ബിങ് ആര്‍ട്ടിസ്റ്റ്, ടെലിവിഷന്‍ അവതാരക, റേഡിയോ ജോക്കി എന്നീ നിലകളിലും ചിന്മയി പ്രശസ്തയാണ്.
