മാവേലിക്കര:ലോഡ്ജിൽ അതിക്രമിച്ച് കയറി,ലോഡ്ജിലെ താമസക്കാരനായ ഭിന്നശേഷിക്കാരന്റെ പണവും മൊബൈൽ ഫോണും കവർന്ന പ്രതികളെ അറസ്റ്റ് ചെയ്തു.മാവേലിക്കര പുതിയകാവ് കുളത്തിന്റെ കരയിൽ വീട്ടിൽ ബാബുക്കുട്ടൻ എന്ന രാജേന്ദ്രപ്രസാദ് (57), പത്തിയൂർ എരുവ പുത്തൻ കണ്ടത്തിൽ വീട്ടിൽ പുൽച്ചാടി എന്ന വിഷ്ണു (30) എന്നിവരെയാണ് മാവേലിക്കര പൊലീസ് ഇൻസ്പെക്ടർ സി. ശ്രീജിത്തിന്റെ നേതൃത്വത്തിൽ അറസ്റ്റ് ചെയ്തത്.
മാവേലിക്കര പ്രൈവറ്റ് ബസ് സ്റ്റാൻഡിനു സമീപമുള്ള ലോഡ്ജിലാണ് സംഭവം നടന്നത്.വെള്ളിയാഴ്ച രാവിലെ ഏഴോടെ അതിക്രമിച്ചു കടന്ന പ്രതികൾ മുറിയിലുണ്ടായിരുന്ന യുവാവിന്റെ ബാഗ് തട്ടിപ്പറിച്ച് 19,000 രൂപയും മൊബൈൽ ഫോണുമായി കടന്നുകളയുകയായിരുന്നു. വെള്ളിയാഴ്ച രാത്രി പത്തോടെയാണ് പ്രതികളെ കസ്റ്റഡിയിൽ എടുത്തത്. പ്രതികളെ കോടതിയിൽ ഹാജരാക്കിയ ശേഷം റിമാൻഡ് ചെയ്തു.