വെള്ളറട: തിരുവനന്തപുരത്ത് നിരവധി ക്ഷേത്രങ്ങളില് കവര്ച്ച നടത്തിയ പ്രതി പോലീസ് പിടിയിൽ. കള്ളിക്കാട് മൈലക്കര ആണ്ടിവിളാകം ചാനല് അരകത്ത് ഗോപി ആശാരി എന്ന ഊളന് ഗോപിയെയാണ് വെള്ളറട പോലീസ് അറസ്റ്റ് ചെയ്തത്.
കഴിഞ്ഞ 27-നാണ് കേസിനാസ്പദമായ സംഭവം. വെള്ളറട താഴെക്കര കളിയ്ക്കല് ശ്രീ ഭദ്രകാളി ദേവി ക്ഷേത്രത്തിലെ രണ്ടു കാണിക്കവഞ്ചി തകര്ത്ത് മോഷണം നടത്തിയ കേസിലാണ് ഇയാൾ അറസ്റ്റിലായത്.
അതേസമയം പ്രതി ജില്ലയിൽ നിരവധി ക്ഷേത്രങ്ങളില് കാണിക്കവഞ്ചി തകര്ത്ത് മോഷണം നടത്തിയിട്ടുണ്ടെന്നും വീടുകളില് നിന്നും സൈക്കിള് മോഷ്ടിച്ചിട്ടുണ്ടെന്നും അടൂരിലെ ഒരു ഷോപ്പ് കുത്തി പൊളിക്കാനും ശ്രമം നടത്തിയിട്ടുണ്ടെന്നും പോലീസ് പറഞ്ഞു.
പ്രതിയെ അറസ്റ്റ് ചെയ്തത് വെള്ളറട സിഐ മൃദുൽ കുമാറിന്റെ നേതൃത്വത്തിൽ ആണ് . കോടതിയില് ഹാജരാക്കിയ പ്രതിയെ റിമാൻഡ് ചെയ്തു.