കൊച്ചി : നടി ഹണി റോസിനെ ലൈംഗികമായി അധിക്ഷേപിച്ച കേസിൽ റിമാൻഡിലുള്ള ബോബി ചെമ്മണൂരിന്റെ ജാമ്യ ഹര്ജി പ്രത്യേകമായി പരിഗണിക്കാന് കഴിയില്ലെന്ന് ഹൈക്കോടതി. അടിയന്തരപ്രാധാന്യത്തോടെ ഹര്ജി പരിഗണിക്കണം എന്ന് ആവശ്യമുന്നയിച്ചാണ് ബോബി ചെമ്മണൂര് ഇന്ന് ഹൈക്കോടതിയെ സമീപിച്ചത്. എന്നാല് എല്ലാ പ്രതികള്ക്കും ഒരേ പരിഗണന എന്ന സമീപനമാണ് കോടതിക്കുള്ളതെന്നും അതിനാൽ തന്നെ ബോബിയുടെ ജാമ്യഹര്ജി ചൊവ്വാഴ്ച പരിഗണിക്കാമെന്നുമാണ് കോടതി പറഞ്ഞിരിക്കുന്നത്. സാധാരണഗതിയില് നാലുദിവങ്ങള്ക്ക് ശേഷം മാത്രമേ ജാമ്യഹര്ജി പരിഗണിക്കൂ, ഈ കേസിലും അങ്ങനെയേ ചെയ്യുള്ളൂ. ബോബി ചെമ്മണൂരിന്റെ കാര്യത്തില് പ്രത്യേക പരിഗണനയില്ല, കോടതി അറിയിച്ചു.
മുതിര്ന്ന അഭിഭാഷകന് ബി. രാമന്പിള്ള ബോബിക്കായി കോടതിയില് ഹാജരായിരുന്നു. അദ്ദേഹത്തോട്, ഈ സമയത്ത് എന്താണ് ഇവിടെ എന്ന് ചോദിച്ചാണ് ജസ്റ്റിസ് പി.വി. കുഞ്ഞികൃഷ്ണന് കേസിനെക്കുറിച്ച് സംസാരിച്ചത്.
കേസിൽ ബോബി ചെമ്മണ്ണൂരിനെ എറണാകുളം ഫസ്റ്റ്ക്ലാസ് ജുഡീഷ്യല് മജിസ്ട്രേറ്റ് കോടതി ഇന്നലെ 14 ദിവസത്തേക്കാണ് റിമാൻഡ് ചെയ്തത്. ഉത്തരവിന് പിന്നാലെ ബോബി ചെമ്മണൂരിന് ദേഹാസ്വാസ്ഥ്യമുണ്ടായി. തുടർന്ന് ബോബിയെ വൈദ്യ പരിശോധനയ്ക്ക് ശേഷമാണ് കാക്കനാട് ജില്ലാ ജയിലിലേക്ക് മാറ്റിയത്.
