ഇസ്ലാമാബാദ്: കഴിഞ്ഞ രണ്ട് വർഷമായി പാകിസ്ഥാൻ കൈവരിച്ച സാമ്പത്തിക നേട്ടങ്ങളെ അമേരിക്ക-ഇറാൻ യുദ്ധം പൂർണ്ണമായും തകിടം മറിച്ചതായി പാക് പ്രധാനമന്ത്രി ഷെഹ്ബാസ് ഷെരീഫ്. ഇന്നലെ നടന്ന മന്ത്രിസഭാ യോഗത്തിലാണ് ആഗോളതലത്തിലെ ഈ സംഘർഷം പാകിസ്ഥാന്റെ സമ്പദ്‌വ്യവസ്ഥയിലുണ്ടാക്കിയ കനത്ത ആഘാതത്തെക്കുറിച്ച് ഷെരീഫ് വിശദീകരിച്ചത്.
യുദ്ധം ആരംഭിച്ച ഫെബ്രുവരി മുതൽ ആഗോള വിപണിയിൽ ഇന്ധനവില കുത്തനെ ഉയർന്നത് പാകിസ്ഥാന് താങ്ങാനാവാത്ത സാമ്പത്തിക ഭാരമാണ് സൃഷ്ടിച്ചിരിക്കുന്നത്. യുദ്ധത്തിന് മുൻപ് പാകിസ്ഥാന്റെ പ്രതിവാര എണ്ണ ഇറക്കുമതി ബിൽ 300 മില്യൺ ഡോളർ ആയിരുന്നിടത്ത് ഇപ്പോൾ അത് 800 മില്യൺ ഡോളറായി വർധിച്ചുവെന്ന് ഷെരീഫ് ചൂണ്ടിക്കാട്ടി. ഫെബ്രുവരി 28-ന് അമേരിക്കയും ഇസ്രായേലും സംയുക്തമായി ഇറാനെ ആക്രമിച്ചതോടെയാണ് ഈ യുദ്ധത്തിന് തുടക്കമായത്. ഇറാന്റെ പരമോന്നത നേതാവ് ആയത്തുള്ള അലി ഖമേനിയും പ്രമുഖ കമാൻഡർമാരും കൊല്ലപ്പെട്ടതിനെത്തുടർന്ന് മേഖലയിലാകെ സംഘർഷം പടരുകയായിരുന്നു. നിലവിൽ അമേരിക്കൻ പ്രസിഡന്റ് ഡോണൾഡ് ട്രമ്പ് പ്രഖ്യാപിച്ച വെടിനിർത്തൽ തുടരുന്ന സാഹചര്യത്തിൽ, സമാധാന ചർച്ചകളുടെ രണ്ടാം ഘട്ടത്തിനും ഇസ്ലാമാബാദ് ആതിഥ്യമരുളാൻ തയ്യാറെടുക്കുകയാണ്. ഫോണിലൂടെയുള്ള ചർച്ചകൾക്ക് താൻ തയ്യാറാണെന്ന് ട്രമ്പ് ആവർത്തിച്ചതും സമാധാന പ്രതീക്ഷകൾ വർധിപ്പിക്കുന്നുണ്ട്.
