വാഷിംഗ്ടണ്‍: ജെയ്ഷെ മുഹമ്മദ് നേതാവ് മസൂദ് അസ്ഹറിനെ ആഗോള ഭീകരനായി പ്രഖ്യാപിക്കാനുള്ള നീക്കത്തെ ചൈന എതിര്‍ത്തതോടെ, ജെയ്ഷെ മുഹമ്മദിനെ കരിമ്പട്ടികയില്‍പ്പെടുത്താനുള്ള പുതിയ പ്രമേയവുമായി അമേരിക്ക യുഎന്‍ രക്ഷാ സമിതിയില്‍. ഫ്രാന്‍സ്, ബ്രിട്ടണ്‍ എന്നിവരുടെ പിന്തുണയോടെയാണ് അമേരിക്ക പുതിയ കരട് പ്രമേയം തയാറാക്കിയിരിക്കുന്നത്.
യുഎന്‍ രക്ഷാ സമിതിയില്‍ 15 അംഗങ്ങളാണുള്ളത്. പ്രമേയം അംഗീകരിക്കപ്പെട്ടാല്‍ മസൂദ് അസ്ഹറിന് യാത്രാവിലക്ക് ഏര്‍പ്പെടുത്തുകയും ലോകമെമ്പാടുമുള്ള ആസ്തികള്‍ മരവിപ്പിക്കുകയും ചെയ്യും . ആയുധ വിലക്കും ഉണ്ടാകും. എന്നാല്‍ ചൈനയുടെ നീക്കത്തെ ആശ്രയിച്ചായിരിക്കും പ്രമേയം അംഗീകരിക്കപ്പെടാനുള്ള സാധ്യത.
പ്രമേയത്തിന്‍റെ കരട് ബ്രിട്ടണ്‍, ഫ്രാന്‍സ് എന്നീ രാജ്യങ്ങള്‍ക്ക് യുഎസ് കൈമാറി. ചൈന മുസ്‌ലിം ഭീകരവാദികളെ സഹായിക്കുകയാണെന്ന് അമേരിക്ക ആരോപിച്ചു. മുസ്‌ലിം വിഭാഗത്തോട് ലജ്ജാകരമായ കാപട്യമാണ് ചൈന നടത്തുന്നതെന്ന് യുഎസ് പ്രതിരോധ സെക്രട്ടറി മൈക് പോംപിയോ പറഞ്ഞു. സ്വന്തം രാജ്യത്ത് ചൈന മുസ്‌ലിംങ്ങളെ അടിച്ചമര്‍ത്തുമ്പോള്‍ മറുഭാഗത്ത് മുസ്‌ലിം ഭീകരവാദത്തെ പ്രോത്സാഹിപ്പിക്കുന്ന സമീപനമാണ് സ്വീകരിക്കുന്നതെന്നും മൈക് പോംപിയോ ട്വിറ്ററില്‍ കുറിച്ചു.
