തിരുവനന്തപുരം : യുവജന കമ്മിഷന്‍ അദ്ധ്യക്ഷ ചിന്താ ജെറോമിനു ഡോക്ട്രേറ്റ് നൽകിയ ഗവേഷണ പ്രബന്ധത്തില്‍ ചങ്ങമ്പുഴയുടെ പ്രശസ്തമായ കവിതകളിലൊന്നായ വാഴക്കുലയുടെ രചയിതാവിന്‍റെ പേരായി രേഖപ്പെടുത്തിയിരിക്കുന്നത് വൈലോപ്പിള്ളിയെന്നാണ് .കേരള സര്‍വകലാശാലയിലെ മുൻ പ്രോ വൈസ്ചന്‍സലറായിരുന്ന ഡോ.പി.പി.അജയകുമാറിന്‍റെ ഗൈഡൻസിലായിരുന്നു ഇവർ ഗവേഷണം പൂര്‍ത്തിയാക്കിയത്. പ്രബന്ധത്തിലെ ആദ്യ അധ്യായത്തില്‍തന്നെയാണ് ഈ ആന മണ്ടത്തരം രേഖപ്പെടുത്തിയിരിക്കുന്നത്.
നവലിബറല്‍ കാലത്തെ മലയാള കച്ചവട സിനിമയുടെ പ്രത്യയശാസ്ത്ര അടിത്തറ എന്ന വിഷയത്തിലാണ് ചിന്ത ഗവേഷണം നടത്തിയത്. ഇംഗ്ലിഷ് സാഹിത്യവും ഭാഷയും എന്ന വകുപ്പിന് കീഴിലായിരുന്നു പഠനം. ആന മണ്ടത്തരമെഴുതിയ പ്രബന്ധത്തിൽ ഇവർക്ക് ഡോക്ടറേറ്റും നൽകി. ചിന്തയും ഗൈഡും ഈ വലിയ പിഴവ് കണ്ടെത്തിയില്ല. സര്‍വകലാശാലയുടെ വിവിധ സമിതികളോ വിദഗ്ധരോ ഗവേഷണ ബിരുദം നല്‍കും മുന്‍പൊന്നും തെറ്റ് തിരിച്ചറിഞ്ഞുമില്ല. ഇങ്ങനെയൊരു കാര്യം ഓര്‍ക്കുന്നില്ലെന്നും പരിശോധിക്കാമെന്നും പറഞ്ഞു ചിന്താ ജെറോം തടി തപ്പി.
