ദില്ലി: പാരാമിലിറ്ററി കാന്റീനുകളില്‍ ഇന്നുമുതല്‍ സ്വദേശി ഉല്‍പ്പന്നങ്ങള്‍ മാത്രം. ഇന്ത്യയിലുടനീളമുള്ള കേന്ദ്ര അര്‍ദ്ധസൈനിക വിഭാഗങ്ങളുടെ കാന്റീനുകളില്‍ നിന്ന് ഇറക്കുമതി ചെയ്ത ആയിരത്തിലധികം ഉല്‍പ്പന്നങ്ങള്‍ ആഭ്യന്തര മന്ത്രാലയം നീക്കം ചെയ്തു.
ജൂണ്‍ ഒന്നുമുതല്‍ പാരാ മിലിറ്ററി കാന്റീനുകളില്‍ രാജ്യത്ത് നിര്‍മിക്കുന്ന ഉല്‍പ്പന്നങ്ങള്‍ മാത്രമേ വില്‍പ്പന നടത്തുവെന്ന് കേന്ദ്രസര്‍ക്കാര്‍ കഴിഞ്ഞ മാസം പ്രഖ്യാപിച്ചതിനെ തുടര്‍ന്നാണ് നടപടി. തദ്ദേശീയ ഉല്‍പ്പന്നങ്ങള്‍ക്ക് പ്രോത്സാഹനം നല്‍കുന്നതിനായാണ് നടപടിയെന്നാണ് സര്‍ക്കാരിന്റെ വിശദീകരണം.
ഉല്‍പ്പന്നങ്ങളെ മൂന്നു വിഭാഗങ്ങളായി തിരിച്ചായിരിക്കും വില്‍പ്പന. ആദ്യ വിഭാഗം പൂര്‍ണമായും രാജ്യത്ത് നിര്‍മിക്കുന്നവയും രണ്ടാം വിഭാഗം അസംസ്‌കൃത വസ്തുക്കള്‍ വിദേശത്തുനിന്നെത്തിച്ചശേഷം രാജ്യത്ത് നിര്‍മിക്കുന്നവയും മൂന്നാം വിഭാഗം വിദേശ ഉല്‍പ്പന്നങ്ങളുമായിരിക്കും.
കേന്ദ്രീയ പൊലീസ് കല്യാണ്‍ ബന്ദറിനാണ് പാരാമിലിറ്ററി കാന്റീനുകളുടെ നടത്തിപ്പ് ചുമതല. കാറ്റഗറി ഒന്ന്, കാറ്റഗറി രണ്ട് എന്നിവക്ക് കീഴിലുള്ള ഉല്‍പ്പന്നങ്ങള്‍ വില്‍പനക്ക് അനുവദിക്കും. കാറ്റഗറി 3-ന് കീഴിലുള്ള ഉല്‍പ്പന്നങ്ങള്‍ പട്ടികയില്‍നിന്ന് പുറത്താകും.
വര്‍ഷം തോറും 2800 കോടി രൂപയുടെ വില്‍പ്പനയാണ് പാരാ മിലിറ്ററി കാന്റീന്‍ വഴി നടക്കുന്നത്. കേന്ദ്ര സായുധ സേനയുടെ ഭാഗമായ സെന്‍ട്രല്‍ റിസര്‍വ് പൊലീസ് ഫോഴ്‌സ്, ബോര്‍ഡര്‍ സെക്യൂരിറ്റി ഫോഴ്‌സ്, സെന്‍ട്രല്‍ ഇന്‍ഡസ്ട്രിയല്‍ സെക്യൂരിറ്റി ഫോഴ്‌സ്, ഇന്‍ഡോ തിബറ്റന്‍ ബോര്‍ഡര്‍ പൊലീസ്, നാഷനല്‍ സെക്യൂരിറ്റി ഗാര്‍ഡ് എന്നിവരാണ് പാരാ മിലിറ്ററി കാന്റീന്‍ ഉപയോഗിക്കുന്നത്
