ദില്ലി: രാജ്യത്ത് കോവിഡ് കേസുകള്‍ വര്‍ധിക്കുന്നു. കഴിഞ്ഞ 24 മണിക്കൂറിനിടെ 1,334 കേസുകളാണ് റിപ്പോര്‍ട്ട് ചെയ്തത്. 27 പേരാണ് 24 മണിക്കൂറിനിടെ രാജ്യത്ത് മരിച്ചത്. ഇതോടെ രാജ്യത്ത് കോവിഡ് ബാധിച്ച് മരിച്ചവരുടെ എണ്ണം 507 ആയി ഉയര്‍ന്നു.
രാജ്യത്ത് 15,712 പേര്‍ക്കാണ് കോവിഡ് സ്ഥിരീകരിച്ചിരിക്കുന്നത്. ഇതില്‍ 2,231 പേര്‍ രോഗവിമുക്തി നേടിയെന്നും ആരോഗ്യമന്ത്രാലയ ജോയിന്റ് സെക്രട്ടറി ലവ് അഗര്‍വാള്‍ പറഞ്ഞു.
കഴിഞ്ഞ 14 ദിവസമായി 23 സംസ്ഥാനങ്ങളിലെ 54 ജില്ലകളില്‍ കോവിഡ് സ്ഥിരീകരിച്ചിട്ടില്ലെന്നും ആരോഗ്യമന്ത്രാലയം അറിയിച്ചു. 3.86 ലക്ഷം കോവിഡ് സാമ്പിള്‍ പരിശോധനകളാണ് രാജ്യത്ത് നടത്തിയത്. ശനിയാഴ്ച മാത്രം 37000 പരിശോധനകള്‍ നടന്നുവെന്നും ലവ് അഗര്‍വാള്‍ പറഞ്ഞു.
കേന്ദ്ര ആഭ്യന്തരമന്ത്രി അമിത് ഷായുടെ അധ്യക്ഷതയില്‍ കോവിഡ് അവലോകന യോഗം നടന്നതായും ആഭ്യന്തര മന്ത്രാലയം അറിയിച്ചു. രാജ്യത്ത് അവശ്യവസ്തുക്കള്‍ക്ക് ക്ഷാമമില്ലെന്നും സ്ഥിതിഗതികള്‍ നിയന്ത്രണവിധേയമാണെന്നും ആരോഗ്യമന്ത്രാലയം കൂട്ടിച്ചേര്‍ത്തു.
