കൊച്ചി: ചലച്ചിത്ര താരം ശ്രീനിവാസന്‍റെ ആരോഗ്യ നിലയില്‍ പുരോഗതി. അദ്ദേഹത്തെ വെന്‍റിലേറ്ററില്‍ നിന്ന് മാറ്റി. അതേ സമയം 24 മുതല്‍ 48 മണിക്കൂര്‍ വരെ ഐസിയുവില്‍ തുടരുമെന്ന് മെഡിക്കല്‍ ബുള്ളറ്റിനില്‍ അറിയിച്ചു. വെന്‍റിലേറ്ററില്‍ നിന്ന് മാറ്റിയ ശേഷം ശ്രീനിവാസന്‍ ഭാര്യയോടും സുഹൃത്തുക്കളോടും സംസാരിച്ചതായാണ് റിപ്പോര്‍ട്ട്.
ഇന്നലെ പാലാരിവട്ടത്തെ ലാല്‍ മീഡിയ സ്റ്റുഡിയോയില്‍ ഡബ്ബിംഗിന് എത്തിയപ്പോഴാണ് നെഞ്ചുവേദനയെ തുടര്‍ന്ന് ശ്രീനിവാസനെ ആശുപത്രിയില്‍ പ്രവേശിപ്പിച്ചത്. ആശുപത്രിയിലെത്തിച്ച അദ്ദേഹത്തിന്‍റെ ഹൃദയത്തിന്‍റെ പ്രവര്‍ത്തനം ദുര്‍ബലമായതോടെ ഇന്‍റന്‍സീവ് കൊറോണറി കെയര്‍ യൂണിറ്റിലേക്കു മാറ്റി ഉപകരണത്തിന്‍റെ സഹായത്തോടെ ശ്വാസം നല്‍കുകയായിരുന്നു. ശ്വാസകോശത്തില്‍ ഫ്ലൂയിഡ് നിറഞ്ഞതും നീര്‍ക്കെട്ടുണ്ടായതുമാണ് ശ്രീനിവാസന്‍റെ ആരോഗ്യനിലയെ ബാധിച്ചത്. ശ്വാസകോശത്തില്‍ നിന്നും ഫ്ലൂയിഡ് നീക്കം ചെയ്തു.
എന്തായാലും അപകട നില തരണം ചെയ്‌തെന്നും ശരീരം മരുന്നുകളോട് പ്രതികരിച്ച്‌ തുടങ്ങിയതായും ആശുപത്രി അധികൃതര്‍ അറിയിച്ചു.
