മുംബൈ : ബി ജെ പി വസായ് – വിരാർ ജില്ലാ ജനറൽ സെക്രട്ടറി ആയി കെ.ബി ഉത്തംകുമാർ നിയമിതനായി .കോട്ടയം ജില്ലയിൽ ചങ്ങനാശ്ശേരി താലൂക്കിലെ പായിപ്പാട് സ്വദേശിയായ ഇദ്ദേഹം മുപ്പത്തിരണ്ട് വർഷമായി മഹാരാഷ്ട്രയിലെ വസായിൽ താമസിക്കുകയാണ് .ബാല്യത്തിൽ രാഷ്ട്രീയ സ്വയംസേവക് സംഘത്തിലൂടെയാണ് ഇദ്ദേഹം പൊതുരംഗത്തേക്ക് എത്തുന്നത് .ആർ എസ് എസിൽ ബാലാ പ്രമുഖ് , മണ്ഡൽ കാര്യവാഹ് എന്നീ ചുമതലകൾ വഹിച്ചിട്ടുണ്ട് . തുടർന്ന് മുംബൈയിൽ എത്തിയ ഇദ്ദേഹം ബി ജെ പി വസായ് റോഡ് മണ്ഡലത്തിൻ്റെ സെക്രട്ടറി , ജനറൽ സെക്രട്ടറി ചുമതലകൾ വഹിച്ചു .മികച്ച പ്രവർത്തനത്തിൻ്റെ ഫലമായി മണ്ഡലത്തിൻ്റെ പ്രസിഡൻ്റ് പദവിയിൽ എത്തി .
രണ്ട് ടേമുകളിലായി ആറു വർഷം പ്രസിഡൻ്റ് പദവിയിൽ ഇദ്ദേഹം പ്രവർത്തിച്ചു .കാര്യമാത്രമായ പ്രവർത്തനങ്ങൾ ഇല്ലാതെ കിടന്ന വസായ് റോഡ് മണ്ഡലത്തിൽ കെ.ബി ഉത്തംകുമാർ പ്രസിഡൻ്റായ ശേഷം നടത്തിയ പ്രവർത്തനങ്ങൾ ഈ മേഖലയിൽ ബി ജെ പി ക്ക് ശക്തമായ അടിത്തറയും വൻ ജനസ്വാധീനവും ഉണ്ടാക്കി . പ്രവർത്തന മികവിൻ്റെ പേരിൽ ബി ജെ പി മഹാരാഷ്ട്ര സംസ്ഥാന നേതൃത്വത്തിൻ്റെ പ്രശംസ പല തവണ ഇദ്ദേഹത്തിന് ലഭിച്ചു . ഇപ്പോൾ ജില്ലാ ജനറൽ സെക്രട്ടറി പദവിയിൽ എത്തിയതും പ്രവർത്തന മികവിൻ്റെ പിൻബലം ഒന്നുകൊണ്ട് മാത്രമാണ് . ബി ജെ പി യിലെ ചുമതലകൾ വഹിക്കുന്നതിനോടൊപ്പം തന്നെ മഹാരാഷ്ട്ര മലയാളി സംഘ് ജനറൽ സെക്രട്ടറി , ബസ്സിൻ കേരള സമാജം വൈസ് പ്രസിഡൻറ് , വസായ് ശബരിഗിരി അയ്യപ്പക്ഷേത്ര ഭരണ സമിതി അംഗം എന്നീ പദവികളും വഹിച്ചിട്ടുണ്ട് . മുംബൈയിലെ പ്രശസ്ത സാമൂഹ്യ സാംസ്കാരിക സംഘടനയായ പ്രതീക്ഷാ ഫൗണ്ടേഷൻ്റെ ചെയർമാൻ , സനാതന സംസ്കൃതിയുടെ ഉന്നമനത്തിനായിട്ട് രൂപം കൊടുത്ത വസായ് സനാതന ധർമ്മസഭയുടെ സംയോജകൻ എന്നീ നിലകളിലും നിലവിൽ പ്രവർത്തിച്ചു വരികയാണ് ഉത്തംകുമാർ.
