തിരുവനന്തപുരം: കഴക്കൂട്ടത്ത് മെഡിക്കല്‍ സ്റ്റോര്‍ ഉടമയെ മര്‍ദ്ദിച്ച എസ്‌ഐ യെ സ്ഥലം മാറ്റി. കഴക്കൂട്ടം എസ്‌ഐ സന്തോഷ് കുമാറിനെയാണ് സ്ഥലം മാറ്റിയത്. ഇന്നലെയാണ് ജനസേവ മെഡിക്കല്‍ ഷോപ്പ് ഉടമയെ എസ്‌ഐ കടയില്‍ കയറി മര്‍ദ്ദിച്ചത്.
എസ്‌ഐ മെഡിക്കല്‍ ഷോപ്പ് ഉടമയെ മര്‍ദ്ദിക്കുന്നതിന്റെ ദൃശ്യങ്ങള്‍ കടയിലെ സിസിടിവിയില്‍ പതിഞ്ഞിരുന്നു. ഈ ദൃശ്യങ്ങള്‍ സഹിതം വാര്‍ത്ത പുറത്തായതോടെ വിശദീകരണവുമായി എസ്‌ഐ രംഗത്ത് എത്തിയിരുന്നു.
മുഖാവരണം ധരിക്കാതിരുന്ന മെഡിക്കല്‍ ഷോപ്പ് ഉടമയോട് മാസ്‌ക് ഇടാന്‍ പറയുക മാത്രമാണ് താന്‍ ചെയ്തത് എന്നായിരുന്നു എസ്‌ഐയുടെ വിശദീകരണം.
എന്നാല്‍ സിസിടിവി ദൃശ്യങ്ങള്‍ സഹിതം കടയുടമ പരാതി നല്‍കിയതോടെ എസ്‌ഐക്കെതിരെ നടപടി സ്വീകരിക്കുകയായിരുന്നു. കണ്‍ട്രോള്‍ റൂമിലേക്കാണ് ഇയാളെ സ്ഥലം മാറ്റിയിരിക്കുന്നത്. കട അടയ്ക്കണം എന്ന് ആവശ്യപ്പെട്ട് എസ്‌ഐ തന്നെ കടയില്‍ കയറി അകാരണമായി മര്‍ദ്ദിച്ചെന്ന് മെഡിക്കല്‍ ഷോപ്പ് ഉടമയുടെ പരാതിയില്‍ പറയുന്നു.
