സ്ത്രീകളുടെ വസ്ത്രധാരണവും ലൈംഗികാതിക്രമങ്ങളും സംബന്ധിച്ചുള്ള വിവാദ പരാമര്‍ശങ്ങള്‍ ആവര്‍ത്തിച്ചുകൊണ്ട് എസ്.വൈ.എസ് ജനറല്‍ സെക്രട്ടറി റഹ്മത്തുള്ള സഖാഫി എളമരം. പുരുഷന്മാരെ പ്രകോപിപ്പിക്കുന്ന തരത്തിലുള്ള വസ്ത്രം ധരിച്ചാല്‍ സ്ത്രീകള്‍ക്ക് നേരെ കയ്യേറ്റങ്ങള്‍ ഉണ്ടാകുമെന്നും, സ്ത്രീകള്‍ മാന്യമായ വസ്ത്രം ധരിക്കണമെന്നും ഖുര്‍ആന്‍ ഇക്കാര്യം വ്യക്തമാക്കുന്നുണ്ടെന്നും അദ്ദേഹം കോഴിക്കോട് നടത്തിയ ഒരു പരിപാടിയില്‍ പറഞ്ഞു.
ഇസ്ലാമില്‍ സ്ത്രീക്കും പുരുഷനും തുല്യനീതിയാണ് ഉള്ളതെന്നും സ്ത്രീകള്‍ക്ക് വലിയ പരിഗണനയാണ് മതം നല്‍കുന്നതെന്നും അദ്ദേഹം അവകാശപ്പെട്ടു. എന്നാല്‍ ഇന്നും സ്ത്രീകള്‍ക്ക് തുല്യ വേതനം ലഭിക്കാത്ത സമൂഹത്തിലാണ് നാം ജീവിക്കുന്നതെന്നും അദ്ദേഹം ചൂണ്ടിക്കാട്ടി. കൂടാതെ, ഫുട്‌ബോള്‍ ലോകകപ്പ് ടീമില്‍ പുരുഷന്മാരോടൊപ്പം സ്ത്രീകളെ മത്സരിപ്പിക്കാത്തത് ചൂണ്ടിക്കാണിച്ചുകൊണ്ട് ആണിനും പെണ്ണിനും ശാരീരികമായ വ്യത്യാസങ്ങളുണ്ടെന്നും അതിനാല്‍ മത്സരങ്ങള്‍ പ്രത്യേകമായാണ് സംഘടിപ്പിക്കുന്നതെന്നും അദ്ദേഹം ന്യായീകരിച്ചു.
