ദില്ലി: യുക്രൈനിലെ സാഹചര്യം സങ്കീർണമെന്ന് വിദേശകാര്യ സെക്രട്ടറി ഹർഷ് വർധൻ ശൃംഗ്ല. 20,000 ഇന്ത്യക്കാരെയാണ് യുക്രൈനിൽ നിന്ന് ഒഴിപ്പിക്കാനുള്ളതെന്നും ഇതുവരെ 4000 പേരെ തിരിച്ചെത്തിച്ചുവെന്നും. ഒഴിപ്പിക്കാനുള്ളവരെ പോളണ്ട്, ഹംഗറി, റുമാനിയ, സ്ലോവാക്യ എന്നീ നാലു രാജ്യങ്ങളുടെ അതിർത്തികൾ വഴി ഒഴിപ്പിക്കാനാണ് നീക്കമെന്നും. റോഡുമാർഗം യുക്രൈനിന്റെ അയൽ രാജ്യങ്ങളിലെത്തിച്ചാണ് ഒഴിപ്പിക്കുകയെന്നും റോഡ് മാർഗമുള്ള രക്ഷാദൗത്യത്തിന്റെ റൂട്ട് തയാറാണെന്നും അദ്ദേഹം പറഞ്ഞു.
മാത്രമല്ല യുക്രൈൻ അതിർത്തിയിൽ ക്യംപ് ഓഫിസുകൾ തുടങ്ങും. ദൗത്യസംഘങ്ങളിലെ ഉദ്യോഗസ്ഥരുടെ ഫോൺ നമ്പറുകൾ പ്രസിദ്ധീകരിച്ചു. രക്ഷാദൗത്യത്തിനായി വിദേശകാര്യമന്ത്രാലയം പ്രത്യേക സംഘങ്ങളെ അയച്ചുവെന്നും വിദേശകാര്യമന്ത്രി എസ്.ജയ്ശങ്കർ യുക്രൈനിന്റെ അയൽരാജ്യങ്ങളുമായി ബന്ധപ്പെടുമെന്നും അദ്ദേഹം അറിയിച്ചു. രക്ഷാദൗത്യത്തിന് വ്യോമസേനയെയും ഉപയോഗിക്കും. ഇതേക്കുറിച്ച് പ്രതിരോധ മന്ത്രാലയവുമായി ചർച്ച നടക്കുകയാണെന്ന് വിദേശകാര്യമന്ത്രാലയം അറിയിച്ചു.
അതേസമയം, ഇന്ത്യക്കാരുടെ സുരക്ഷയ്ക്കായി എംബസി യുക്രൈൻ പ്രസിഡന്റിന്റെ സഹായം തേടിയിരിക്കുകയാണ്. വിദ്യാർഥികളടക്കമുള്ളവർക്ക് ഭക്ഷണവും കുടിവെള്ളവും ഉറപ്പാക്കണമെന്ന് ആവശ്യപ്പെട്ട് കത്തു നൽകുകയും ചെയ്തു. കൂടാതെ യുക്രൈൻ പ്രതിസന്ധിയുടെ സാമ്പത്തിക ആഘാതവും അസംസ്കൃത എണ്ണയുടെ വിലക്കയറ്റം ലഘൂകരിക്കാനുള്ള വഴികളും ചർച്ച ചെയ്യുന്നതിനായി രാജ്യത്തിന്റെ പ്രധാനമന്ത്രി നരേന്ദ്ര മോദി ഔദ്യോഗിക വസതിയിൽ ഉന്നത മന്ത്രിമാരുമായി കൂടിക്കാഴ്ച നടത്തി. കേന്ദ്ര ആഭ്യന്തര മന്ത്രി അമിത് ഷാ, പ്രതിരോധ മന്ത്രി രാജ്നാഥ് സിങ്, കേന്ദ്രധനമന്ത്രി നിർമല സീതാരാൻ എന്നിവരുൾപ്പെടെ മറ്റ് ഉദ്യോഗസ്ഥരും യോഗത്തിൽ പങ്കെടുത്തു.

