ലക്‌നൗ: ഹെർണിയ ചികിത്സയ്ക്ക് എത്തിയ 46 കാരന്റെ വയറ്റിൽ നിന്നും ഓപ്പറേഷൻ ചെയ്ത് എടുത്തത് ഗർഭപാത്രവും അണ്ഡാശയവും. ഉത്തർപ്രദേശിലെ ഗോരഖ്പൂരിലാണ് ഡോക്ടർമാരെ പോലും അതിശയിപ്പിച്ച സംഭവം നടന്നത്. കടുത്ത വയറുവേദനയെ തുടർന്ന് ഹെർണിയ ശസ്ത്രക്രിയ്ക്ക് എത്തിയതായിരുന്നു രാജ്ഗിർ മിസ്ത്രി. രണ്ട് കുട്ടികളുടെ പിതാവായ ഇദ്ദേഹത്തിന്റെ ശരീരത്തിനുള്ളിലാണ് പൂർണ വളർച്ച എത്താത്ത ഗർഭപാത്രവും അണ്ഡാശയവും കണ്ടെത്തിയത്.
കുറച്ചുനാളുകളായി വയറുവേദന അനുഭവപ്പെട്ടതിനെ തുടർന്ന് അൾട്രാസൗണ്ട് ചെയ്യാൻ അദ്ദേഹം തീരുമാനിച്ചു. വയറ്റിൽ മുഴ പോലെ മാംസകഷ്ണം കണ്ടെത്തുകയും തുടർന്ന് അദ്ദേഹത്തെ വിദഗ്ധ പരിശോധനയ്ക്ക് വിധേയനാക്കുകയുമായിരുന്നു. തുടർന്ന് ബിആർഡി മെഡിക്കൽ കോളേജിലെ സർജൻ പ്രൊഫസർ ഡോ. നരേന്ദ്ര ദേവിന്റെ നേതൃത്വത്തിൽ അദ്ദേഹത്തെ ശസ്ത്രക്രിയയ്ക്ക് വിധേയനാക്കി.
അപ്പോഴാണ് വയറ്റിൽ നിന്ന് പൂർണ വളർച്ച എത്താത്ത ഗർഭപാത്രം ലഭിച്ചത്. ഓപ്പറേഷനുശേഷം രാജ്ഗിർ മിസ്ത്രി ഇപ്പോൾ ആരോഗ്യവാനാണ്. ഇത് മിസ്ത്രിയുടെ ശരീരത്തിലെ ജന്മവൈകല്യമാണെന്നും സ്ത്രീകളുടേതിന് സമാനമായ യാതൊരുവിധ സവിശേഷതകളും അദ്ദേഹം കാണിച്ചില്ലെന്നും ഡോക്ടർ കൂട്ടിച്ചേത്തു.
