ഇന്ത്യ, മ്യാൻമർ, ബംഗ്ലാദേശ് എന്നിവിടങ്ങളിൽ വ്യാപിച്ചുകിടക്കുന്ന ചിൻ-കുക്കി-സോ ഗോത്രക്കാർ അന്താരാഷ്ട്ര അതിർത്തികൾ മറികടന്ന് തങ്ങളുടെ പൊതുവായ സാംസ്കാരികവും മതപരവുമായ കീഴിൽ ഒന്നിക്കണമെന്ന് മിസോറാം മുഖ്യമന്ത്രി ലാൽദുഹോമയുടെ ആഹ്വാനം. ഇക്കഴിഞ്ഞ സെപ്റ്റംബർ 4 ന് അമേരിക്കയിലെ ഇൻഡ്യാനപൊളിസിൽ സംസാരിക്കവെയാണ് ദൂരവ്യാപകമായ പ്രത്യാഘാതങ്ങളുള്ള വിഘടനവാദ പ്രസ്ഥാനത്തിന് പോലും തുടക്കം കുറിക്കാൻ സാധ്യതയുള്ള പ്രസ്താവന ലാൽദുഹോമയുടെ ഭാഗത്ത് നിന്ന് ഉണ്ടായത്.
ഈ ഗോത്രങ്ങൾ മൂന്ന് രാജ്യങ്ങളിലായി അന്യായമായി വേർതിരിക്കപ്പെട്ടിരിക്കുന്നു എന്ന ആശയത്തെ കേന്ദ്രീകരിച്ചായിരുന്നു ലാൽദുഹോമയുടെ പ്രസംഗം. ഈ ഗോത്രങ്ങൾ അവരുടെ ദേശീയതയുടെ ഭാഗധേയം വീണ്ടെടുക്കാൻ ഒരുമിച്ച് നിൽക്കണമെന്നും അദ്ദേഹം വേദിയിൽ പറഞ്ഞു.
“ഞങ്ങളെ സംബന്ധിച്ചിടത്തോളം, നമ്മുടെ ജനതയെ 3 രാജ്യങ്ങളായി വിഭജിക്കുന്നത് ഞങ്ങൾ ഒരിക്കലും അംഗീകരിക്കില്ല. ഇത് ഒരിക്കലും അംഗീകരിക്കാനാവില്ല. അതിർത്തികൾ ബ്രിട്ടീഷ് സർക്കാർ അടിച്ചേൽപ്പിക്കുകയായിരുന്നു. ആ കമ്മറ്റിയിൽ, ഞങ്ങളുടെ പ്രതിനിധി ഉണ്ടായിരുന്നില്ല, ഞങ്ങളോട് ഒരിക്കലും കൂടിയാലോചിച്ചില്ല. അതിനാൽ തന്നെ ഇപ്പോഴത്തെ അതിർത്തികൾ അടിച്ചേൽപ്പിക്കപ്പെട്ടവയാണ്. ഞങ്ങൾക്കിടയിൽ ഒരു അതിർത്തി വേലി നിർമ്മിക്കുന്നത് ഞങ്ങൾ ഒരിക്കലും അംഗീകരിക്കില്ല.”- ലാൽദുഹോമ പറഞ്ഞു. അദ്ദേഹത്തിൻ്റെ പ്രസ്താവന കാര്യമായ പ്രത്യാഘാതങ്ങൾ ഉൾക്കൊള്ളുന്നതാണെന്നാണ് വിദഗ്ദർ അഭിപ്രായപ്പെടുന്നത് .
ദക്ഷിണേഷ്യയുടെ ഭൗമരാഷ്ട്രീയ ഭൂപ്രകൃതിയെ പുനർനിർമ്മിക്കാൻ ലക്ഷ്യമിടുന്ന വിദേശ ഇടപെടലിനെക്കുറിച്ച് മുന്നറിയിപ്പ് നൽകിയ മുൻ ബംഗ്ലാദേശ് പ്രധാനമന്ത്രി ഷെയ്ഖ് ഹസീനയുടെ സമീപകാല പ്രസ്താവനകളിൽ പരാമർശിക്കുന്ന പ്രസ്ഥാനത്തെ അല്ലെങ്കിൽ രാജ്യത്തെ ലാൽദുഹോമയുടെ പ്രസംഗം പിന്തുണയ്ക്കുന്നുണ്ടോ എന്ന സംശയവും ഉയരുന്നുണ്ട്.
ഈ മേഖലയിൽ ഒരു ക്രിസ്ത്യൻ ഭൂരിപക്ഷ രാഷ്ട്രം സ്ഥാപിക്കുവാൻ പാശ്ചാത്യ രാജ്യങ്ങൾക്ക് താൽപര്യമുണ്ടെന്ന് ഹസീന വെളിപ്പെടുത്തിയിരുന്നു. ഒരു പാശ്ചാത്യ രാജ്യത്തിന്റെ ഉദ്യോഗസ്ഥൻ ബംഗ്ലാദേശ്, മ്യാൻമർ, ഇന്ത്യ എന്നിവയുടെ ചില ഭാഗങ്ങൾ ഉൾക്കൊള്ളിച്ച് ഒരു സ്വതന്ത്ര ക്രിസ്ത്യൻ രാഷ്ട്രം രൂപപ്പെടുത്താനുള്ള പദ്ധതികൾ രൂപപ്പെടുത്തി എന്നായിരുന്നു ഹസീനയുടെ പരാമർശം. ചിൻ-കുക്കി-സോ ഗോത്രക്കാർക്കായി “സോ” എന്ന പേരിൽ മാതൃരാജ്യം രൂപീകരിക്കുന്നതിൽ പാശ്ചാത്യർ പിന്തുണയ്ക്കുമെന്നും മുൻ പ്രധാനമന്ത്രി അഭിപ്രായപ്പെട്ടിരുന്നു.
“സോറാം” എന്ന് വിളിക്കപ്പെടുന്ന ഈ ഗോത്രങ്ങൾ ബംഗ്ലാദേശ്, മ്യാൻമറിൻ്റെ ചിൻ സംസ്ഥാനം, ഇന്ത്യയിലെ മിസോറാം, മണിപ്പൂർ സംസ്ഥാനങ്ങൾ എന്നിവിടങ്ങളിലാണ് കഴിയുന്നത്. ഇവരുടെ ഏകീകൃത രാജ്യത്തിനായുള്ള നീക്കത്തിന് അമേരിക്കയിലെ വിവിധ സഭാ സംഘടനകളിൽ നിന്നും സോറം പീപ്പിൾസ് മൂവ്‌മെൻ്റ് (ZPM) പോലുള്ള പ്രാദേശിക പാർട്ടികളിൽ നിന്നും മിസോറാമിലെ സോ റീയൂണിഫിക്കേഷൻ ഓർഗനൈസേഷൻ (ZRO),മിസോ നാഷണൽ ഫ്രണ്ട് (എംഎൻഎഫ്). എന്നീ സംഘടനകളിൽ നിന്നും പിന്തുണ ലഭിച്ചതായും ഹസീന വെളിപ്പെടുത്തിയിരുന്നു.
നിലവിൽ മ്യാൻമറിലെ ചിൻ നാഷണൽ ആർമി (സിഎൻഎ), ഇന്ത്യയിലെ കുക്കി നാഷണൽ ഫ്രണ്ട് (കെഎൻഎഫ്), മറ്റ് അനുബന്ധ വിഭാഗങ്ങൾ തുടങ്ങിയ ഗ്രൂപ്പുകൾ അതത് പ്രദേശങ്ങളിൽ സ്വയംഭരണാവകാശം ആവശ്യപ്പെടുകയാണ്. ഇതിനിടെയുള്ള അമേരിക്കയിലെ ലാൽദുഹോമയുടെ പ്രസംഗം, പാശ്ചാത്യ ശക്തികൾ ഈ വിഘടനവാദ വികാരങ്ങൾ മുതലെടുക്കുമെന്നതിൽ എത്തിക്കുമെന്നാണ് ആശങ്ക.
ഒരു ക്രിസ്ത്യൻ രാഷ്ട്രം സ്ഥാപിക്കാനുള്ള വിദേശ ഉദ്ദേശ്യങ്ങളെക്കുറിച്ചുള്ള ഹസീനയുടെ വെളിപ്പെടുത്തൽ ഇന്ത്യയുടെ പരമാധികാരത്തെയും ദേശീയ അഖണ്ഡതയെയും കുറിച്ചുള്ള നിലവിലുള്ള ആശങ്കകൾക്ക് അടിവരയിടുന്നതായിരുന്നു. തൻ്റെ സർക്കാരിനുള്ള പാശ്ചാത്യ പിന്തുണയ്‌ക്ക് പകരമായി ഒരു യുഎസ് ഉദ്യോഗസ്ഥൻ ബംഗ്ലാദേശിലെ സെൻ്റ് മാർട്ടിൻസ് ദ്വീപിൽ ഒരു അമേരിക്കൻ വ്യോമതാവളത്തിന് അനുമതി തേടിയെന്ന ഹസീനയുടെ പ്രസ്താവന, പാശ്ചാത്യരുടെ ആഴത്തിലുള്ള പ്രാദേശിക താൽപ്പര്യങ്ങളെ സൂചിപ്പിക്കുന്നതാണ്. എന്നാൽ അവർ അന്ന് ആ അഭ്യർത്ഥന തള്ളിയിരുന്നു.
മിസോറാമും മണിപ്പൂരും സ്ഥിതി ചെയ്യുന്ന ഇന്ത്യയുടെ വടക്കുകിഴക്കൻ പ്രദേശം വംശീയ വൈവിധ്യത്തിൻ്റെയും രാഷ്ട്രീയ ദുർബലതയുടെയും ഒരു കേന്ദ്രമാണ്. ക്രിസ്ത്യൻ ഭൂരിപക്ഷ രാഷ്ട്രത്തിനായുള്ള ലാൽദുഹോമയുടെ ഇന്ത്യാനാപൊളിസ് പ്രസംഗം നിലവിലുള്ള വംശീയ തീവ്രവാദവുമായി പ്രതിധ്വനിക്കുകയും സ്വയംഭരണത്തിനായുള്ള തീവ്രമായ ആവശ്യങ്ങളിലേക്ക് നയിക്കുകയും ചെയ്യുമെന്ന് നിരീക്ഷകർ ഭയപ്പെടുന്നു. ചുരുക്കത്തിൽ ചിൻ-കുക്കി-സോ ജനതയ്‌ക്കിടയിലുള്ള ഐക്യത്തിനായുള്ള ലാൽദുഹോമയുടെ ആഹ്വാനത്തിൻ്റെയും അതിർത്തികൾ പുനർനിർണയിക്കാനുള്ള പാശ്ചാത്യ താൽപര്യങ്ങളുടെ ഹസീനയുടെ മുന്നറിയിപ്പുകളുടെയും യാദൃശ്ചികത അത്യന്തം ആശങ്കാജനകമാണ്.
