കോട്ടയത്ത് ട്രെയിനിൽ നിന്ന് വീണ് വിദ്യാർത്ഥിക്ക് ദാരുണാന്ത്യം. മറന്നു വച്ച കണ്ണടയെടുക്കാൻ തിരികെ കയറിയ ശേഷം ഇറങ്ങാൻ ശ്രമിക്കുന്നതിനിടെയായിരുന്നു അപകടം. രാവിലെ ആറോടെ കോട്ടയം റെയിൽവേ സ്റ്റേഷനിൽ നടന്ന അപകടത്തിൽ പുതുപ്പള്ളി അഞ്ചേരി ഇടശ്ശേരിക്കുന്നേൽ ദീപക് ജോർജ് വർക്കിയാണു (25) മരിച്ചത്. കോട്ടയം ഇടശേരിക്കുന്നേൽ വൺ ഗ്രാം ഗോൾഡ് ജ്വല്ലറി ആൻഡ് ട്രാവൽ ഏജൻസി ഉടമ ജോർജ് വർക്കിയുടേയും സോളിയുടെയും മകനാണ്.
പൂനെയിൽ ഹോട്ടൽ മാനേജ്മെന്റ് വിദ്യാർത്ഥിയായായ ദീപക് കോഴ്സ് പൂർത്തിയാക്കി
പൂനെ –കന്യാകുമാരി ജയന്തി ജനത എക്സ്പ്രസിലാണ് മടങ്ങിയെത്തിയത്. കോട്ടയം റെയിൽവേ സ്റ്റേഷനിൽ ഇറങ്ങിയ ദീപക് മറന്നുവച്ച കണ്ണട ട്രെയിനിൽനിന്ന് എടുക്കാനായി തിരികെ കയറിയിരുന്നു. കണ്ണട എടുത്ത ശേഷം തിരികെ ഇറങ്ങാൻ ശ്രമിക്കുമ്പോഴേക്കും ട്രെയിൻ നീങ്ങിത്തുടങ്ങുകയും ട്രെയിൻ പ്ലാറ്റ്‌ഫോം പിന്നിടുകയും ചെയ്തിരുന്നു. തുടർന്ന് താഴേക്കു ചാടാൻ ശ്രമിച്ച ദീപക് ട്രെയിനിന്റെ അടിയിൽ അകപ്പെടുകയായിരുന്നു. മൃതദേഹം കോട്ടയം മെഡിക്കൽ കോളജ് ആശുപത്രിയിലേക്കു മാറ്റി.
