നവകേരളസദസ്സില്‍ പരാതി പറയാൻ മുഖ്യമന്ത്രിക്കരികിലേക്ക് പോകാൻ ശ്രമിച്ച യുവാവ് പോലീസ് കസ്റ്റഡിയില്‍. മുളങ്കുന്നത്തുകാവ് ആരോഗ്യസര്‍വകലാശാല ഒ.പി. ഗ്രൗണ്ടിൽ വച്ച് നടന്ന വടക്കാഞ്ചേരി മണ്ഡലത്തിലെ നവകേരളസദസിനിടെയായിരുന്നു നാടകീയ സംഭവങ്ങൾ അരങ്ങേറിയത്. വടക്കാഞ്ചേരി സ്വദേശി റഫീഖിനെയാണ് പോലീസ് കസ്റ്റഡിയില്‍ എടുത്തത്.
വടക്കാഞ്ചേരി നഗരസഭയില്‍ വ്യാപാരസമുച്ചയവുമായി ബന്ധപ്പെട്ട് ലൈസന്‍സിനായി റഫീഖ് വളരെ കാലമായി ശ്രമിക്കുന്നുണ്ടായിരുന്നു. നാലുവര്‍ഷമായിട്ടും ശ്രമങ്ങൾ സാധ്യമാവാത്തതോടെയായിരുന്നു മുഖ്യമന്ത്രിയെ നേരിട്ടുകണ്ട് പരാതി പറയാനായി ഇയാൾ നവകേരളസദസ്സ് നടക്കുന്ന വേദിയിലെത്തിയത് എന്നാണ് വിവരം.
പ്രസംഗത്തിനുശേഷം മുഖ്യമന്ത്രി വേദിയില്‍നിന്ന് ഇറങ്ങാന്‍ ഒരുങ്ങുമ്പോഴാണ് റഫീഖ് തനിക്ക് പരാതി അറിയിക്കാനുണ്ടെന്ന് പറഞ്ഞ് വേദിക്കരികിലേക്ക് നീങ്ങിയത്. സ്ഥലത്തുണ്ടായിരുന്ന പാര്‍ട്ടി പ്രവര്‍ത്തകര്‍ റഫീഖിനെ തള്ളി മാറ്റാന്‍ ശ്രമിച്ചപ്പോള്‍ പോലീസ് ഇടപെടുകയായിരുന്നു. സുരക്ഷാ പ്രശ്‌നം ചൂണ്ടിക്കാട്ടിയാണ് ഇയാളെ കസ്റ്റഡിയില്‍ എടുത്തത്.
