ദില്ലി: പ്രവാസി ഭാരതീയ ദിവസത്തിൽ ആശംസകളർപ്പിച്ച് പ്രധാനമന്ത്രി നരേന്ദ്രമോദി. സ്വന്തം സ്വത്വം തിരിച്ചറിഞ്ഞു കൊണ്ട് ലോകത്തിന്റെ പല ഭാഗങ്ങളിൽ ജീവിക്കുന്ന ഭാരതീയർ വിവിധ രംഗങ്ങളിൽ തിളങ്ങി നിൽക്കുന്നെന്നും അദ്ദേഹം പറഞ്ഞു. ട്വിറ്ററിലൂടെയാണ് അദ്ദേഹം ആശംസകൾ അറിയിച്ചത്.
‘എല്ലാവർക്കും ആശംസകൾ, പ്രത്യേകിച്ച് രാഷ്ട്രത്തിനു പുറത്തുള്ള ഇന്ത്യൻ സമൂഹത്തിന്. സ്വന്തമായി ഒരു അസ്തിത്വമുണ്ടാക്കിയ ഇന്ത്യൻ സമൂഹം, രാജ്യത്തിന് പുറത്തും നിരവധി മേഖലകളിൽ തിളങ്ങി നിൽക്കുന്നു. അവരുടെ നേട്ടങ്ങളിൽ നമ്മൾ വളരെയധികം അഭിമാനിക്കുന്നു!’- നരേന്ദ്രമോദി ട്വിറ്ററിൽ കുറിച്ചു.
അതേസമയം 1915 ജനുവരി ഒമ്പതാം തീയതിയാണ് ദക്ഷിണാഫ്രിക്കൻ വാസം മതിയാക്കി മഹാത്മാഗാന്ധി ഭാരതത്തിൽ തിരിച്ചെത്തിയത്. അതു കൊണ്ടാണ്, പ്രവാസി ഭാരതീയ ദിവസമായി ആഘോഷിക്കാൻ ഈ ദിനം തന്നെ സർക്കാർ തെരഞ്ഞെടുത്തത്.
ലോകത്തിന്റെ മുക്കിലും മൂലയിലുമായി പല രാഷ്ട്രങ്ങളിൽ ജീവിക്കുന്ന ഇന്ത്യക്കാരുടെ സ്മരണയിൽ രാജ്യം ഈ ദിനം ആഘോഷിക്കുന്നു.
