അബുദാബി: അബുദാബി ടി10 ക്രിക്കറ്റ് ലീഗില്‍ ക്രിസ് ഗെയ്ലിന്റെ ബാറ്റിങ്
താണ്ഡവം. ലീഗില്‍ 12 പന്തില്‍ അര്‍ധ സെഞ്ച്വറി തികച്ച ഗെയ്ല്‍ വെറും 22 പന്തില്‍ 84 റണ്‍സാണ് അടിച്ച് കൂട്ടിയത്. 9 സിക്‌സും 6 ബൗണ്ടറിയും പറത്തിയ ഗെയ്ലിന്റെ സ്‌ട്രൈക്കറേറ്റ് 381.82 ആയിരുന്നു.
ഗെയ്ലിന്റെ വെടിക്കെട്ടിന്റെ ബലത്തില്‍ മറാത്ത അറേബ്യന്‍സിനെതിരെ 9 വിക്കറ്റിന്റെ കൂറ്റന്‍ ജയവും സ്വന്തമാക്കി. ആദ്യം ബാറ്റ് ചെയ്ത മറാത്ത നിശ്ചിത ഓവറില്‍ നാല് വിക്കറ്റ് നഷ്ടത്തില്‍ 97 റണ്‍സാണ് നേടിയത്. അലിഷന്‍ ഷറഫു (23 പന്തില്‍ 33),മുഹമ്മദ് ഹഫീസ് (13 പന്തില്‍ 20),ഷുഹൈബ് മാലിക് (9 പന്തില്‍ 15) എന്നിവരാണ് മറാത്തയുടെ പ്രധാന സ്‌കോറര്‍മാര്‍. മറുപടിക്കിറങ്ങിയ അബുദാബിക്ക് പോള്‍ സ്റ്റിര്‍ലിങ്ങിന്റെ (5 പന്തില്‍ 11 ) വിക്കറ്റ് മാത്രമാണ് നഷ്ടമായത്. ജോ ക്ലാര്‍ക്ക് (6 പന്തില്‍ 5) ഗെയ്‌ലിനൊപ്പം പുറത്താവാതെ നിന്നു. വെറും 5.3 ഓവറില്‍ അബുദാബി വിജയം സ്വന്തമാക്കി.
ബാറ്റിങ് വിസ്ഫോടനത്തിന് പിന്നാലെ ടീം മെന്ററായ കുമാര്‍ സംഗക്കാരയ്ക്കാണ് ഗെയ്ല്‍ എല്ലാ ക്രഡിറ്റും നല്‍കിയത്. അറിവ് നേടുന്നതിന് അവസാനമില്ല. സംഗാ, നിങ്ങളാണ് ഇതിന് പിന്നില്‍, നിങ്ങളൊരു ഇതിഹാസമാണ്…ഗെയ്ല്‍ വ്യക്തമാക്കി.
