കേരളത്തിലെ സ്വാശ്രയ കോളേജുകൾക്ക് അക്രഡിറ്റേഷൻ നിര്‍ബന്ധമാക്കുന്നു. ഉന്നത വിദ്യാഭ്യാസ കൗൺസിൽ ഗവേണിങ് ബോഡി യോഗത്തിലാണ് പുതിയ തീരുമാനം. മന്ത്രി കെ.ടി ജലീലാണ് ഇക്കാര്യം അറിയിച്ചത്.
ആറു വര്‍ഷം പൂര്‍ത്തിയാക്കിയ സ്വാശ്രയ കോളേജുകൾക്ക് ഇനി അക്രഡിറ്റേഷൻ ഇല്ലാതെ പുതിയ കോഴ്സ് പൂര്‍ത്തിയാക്കാനാവില്ല. എന്നാൽ, കോളേജുകൾ ഇനി അക്രഡിറ്റേഷൻ ഫീസായി 25,000 രൂപ നൽകിയാൽ മതി. അക്രഡിറ്റേഷൻ ലഭിക്കുന്നവര്‍ക്ക് ഈ തുക തിരികെ നൽകും.
അതേസമയം, വിഷയാന്തര വിഷയങ്ങളിൽ രണ്ടിലധികം സര്‍വകലാശാലകൾ സഹകരിച്ച് ബിരുദ കോഴ്സുകൾ ആരംഭിക്കാൻ തീരുമാനിച്ചു. അസിസ്റ്റൻ്റ് പ്രൊഫസര്‍ തസ്തികയിലേക്ക് അപേക്ഷിക്കാനുള്ള പ്രായപരിധി എടുത്ത് കളയണമെന്നും യോഗം ശുപാര്‍ശ ചെയ്തിട്ടുണ്ട്. മാത്രമല്ല, വിഷയാന്തര വിഷയങ്ങളിൽ രണ്ടിലധികം സര്‍വകലാശാലകൾ സഹകരിച്ച് ബിരുദ കോഴ്സുകൾ ആരംഭിച്ചേക്കും.
നൂതന ശാഖകളിലെ പുതിയ വിഷയങ്ങളിൽ കോഴ്സുകൾ ആരംഭിക്കാനുള്ള സാധ്യത പഠിക്കാനും സമിതിയെ ചുമതലപ്പെടുത്തിയിട്ടുണ്ട്. ബഹു വൈജ്ഞാനിക അന്തര്‍ വൈജ്ഞാനിക കോഴ്സുകൾ തിരഞ്ഞെടുക്കുന്നതിന് വിദ്യാര്‍ഥികൾക്ക് സ്വാതന്ത്ര്യം ഉണ്ടാകും. എന്നാൽ, തുല്യതാ സര്‍ട്ടിഫിക്കേറ്റ് ആവശ്യപ്പെടുന്ന രീതി പി.എസ്.സി നിര്‍ത്തലാക്കുന്നതിനായി സ്പെഷ്യൽ റൂൾ പരിഷ്കരിക്കാൻ ശുപാര്‍ശ വന്നിട്ടുണ്ട്.
അതേസമയം, ബിരുദങ്ങൾക്ക് തുല്യതാ സര്‍ട്ടിഫിക്കേറ്റ് ആവശ്യപ്പെടുന്നത് നിര്‍ത്തലാക്കണമെന്നും മുഖ്യ വിഷയത്തിലോ ബന്ധപ്പെട്ട വിഷയത്തിലോ ഡിഗ്രിയുള്ളവരെ ഒരേപോലെ ജോലിക്കും ഉപരിപഠനത്തിനും പരിഗണിക്കണമെന്നും യോഗം നിര്‍ദേശിച്ചു. തുല്യതാ സര്‍ട്ടിഫിക്കേറ്റ് ആവശ്യപ്പെടുന്ന രീതി പി.എസ്.സി നിര്‍ത്തലാക്കുന്നതിനായി സ്പെഷ്യൽ റൂൾ പരിഷ്ക്കരിക്കാനും ശുപാര്‍ശ ചെയ്തു. വിദ്യാര്‍ഥി പ്രവേശനത്തിന് പ്രാദേശിക വെയിറ്റേജ് നൽകുന്ന രീതി നിര്‍ത്തലാക്കണമെന്നും സര്‍വകലാശാലകളോട് യോഗം ആവശ്യപ്പെട്ടു. മാത്രമല്ല, പരീക്ഷാ സംവിധാനത്തിൽ പാസ് വേഡിനു പകരം ബയോമെട്രിക് സുരക്ഷാ സംവിധാനം നിര്‍ബന്ധമായും ഏര്‍പ്പെടുത്തും. സര്‍വകലാശാല ലൈബ്രറികളെ പൊതു പ്ലാറ്റ്ഫോമിലേക്ക് ഏകീകരിക്കുന്നതിനുള്ള നിര്‍ദേശവും യോഗം അംഗീകരിച്ചിട്ടുണ്ട്.
