ചെന്നൈ : പ്രശസ്ത ചലച്ചിത്ര താരവും ദേശീയ വനിതാ കമ്മിഷൻ അംഗവുമായ ഖുശ്ബു സുന്ദറിനെതിരെ സ്ത്രീ വിരുദ്ധ പരാമർശം നടത്തിയ ഡിഎംകെ വക്താവ് ശിവാജി കൃഷ്ണമൂർത്തിയെ പാർട്ടിയിൽനിന്ന് പുറത്താക്കി. എല്ലാ പദവികളിൽനിന്നും ഇയാളെ നീക്കിയതായി ജനറൽ സെക്രട്ടറി ദുരൈമുരുകൻ സ്ഥിരീകരിച്ചു. സംഭവത്തിൽ ശിവാജിക്കെതിരെ കൊടുങ്ങയൂർ പൊലീസ് കേസെടുത്തു.
നേരത്തെ ഗവർണർക്കെതിരായ പരാമർശത്തിനെത്തുടർന്ന് ഈ വർഷം ശിവാജിയെ സസ്പെൻഡ് ചെയ്തിരുന്നു. എന്നാൽ പരാമർശത്തിൽ മാപ്പ് പറഞ്ഞതിനെ തുടർന്ന് അടുത്തിടെ ശിവാജിയെ പാർട്ടിയിൽ തിരിച്ചെടുക്കുകയായിരുന്നു.
‘‘ഡിഎംകെ സ്ത്രീവിരുദ്ധ പ്രസ്താവന നടത്തുന്നവരുടെ താവളമായി മാറി. പതിവായി അവഹേളനം നടത്തുന്നയാളാണ് ഇയാൾ. ഇത്തരത്തിലുള്ള നിരവധി ആളുകളാണ് ഡിഎംകെയിലുള്ളത്. സ്ത്രീകളെ അവഹേളിച്ച് സംസാരിക്കുന്നവർക്കാണ് ഡിഎംകെ അവസരങ്ങൾ നൽകുന്നത്’’– ഖുശ്ബു പ്രതികരിച്ചു.