ജയ്പൂര്‍: മുഷ്താഖ് അലി ട്രോഫി ടി20 ടൂര്‍ണമെന്‍റില്‍ ഹൈദരാബാദിനെതിരെ ഗോവക്കായി തകര്‍പ്പന്‍ ബൗളിംഗ് പ്രകടനം പുറത്തെടുത്ത് അര്‍ജ്ജുന്‍ ടെന്‍ഡുല്‍ക്കര്‍. ഹൈദരാബാദിനെതിരെ നാലോവറില്‍ 10 റണ്‍സ് മാത്രം വഴങ്ങി അര്‍ജ്ജുന്‍ നാലു വിക്കറ്റെടുത്തു. അര്‍ജ്ജുന്‍ മിന്നിയെങ്കിലും മത്സരത്തില്‍ ഗോവക്ക് ജയിക്കാനായില്ല.
ആദ്യം ബാറ്റ് ചെയ്ത ഹൈദരാബാദ് തിലക് വര്‍മയുടെയും തന്‍മയ് അഗര്‍വാളിന്‍റെയും അര്‍ധസെഞ്ചുറികളുടെ മികവില്‍ 20 ഓവറില്‍ ആറ് വിക്കറ്റ് നഷ്ടത്തില്‍ 177 റണ്‍സെടുത്തു.തിലക് വര്‍മ 46 പന്തില്‍ 62 റണ്‍സെടുത്തപ്പോള്‍ തന്‍മയ് 41 പന്തില്‍ 55 റണ്‍സെടുത്തു. 178 റണ്‍സ് വിജയലക്ഷ്യം പിന്തുടര്‍ന്ന ഗോവ 18.5 ഓവറില്‍ 140 റണ്‍സിന് ഓള്‍ ഔട്ടായി. ബൗളിംഗില്‍ തിളങ്ങിയെങ്കിലും ബാറ്റിംഗില്‍ രണ്ട് റണ്‍സെടുത്ത് അര്‍ജ്ജുന്‍ നിരാശപ്പെടുത്തി.
