അയോധ്യ കേസില് സുപ്രീം കോടതി വിധി വരാനിരിക്കുന്ന പശ്ചാത്തലത്തില് കേന്ദ്രമന്ത്രിമാര്ക്ക് പ്രധാനമന്ത്രി നരേന്ദ്ര മോദിപ്രത്യേക നിർദേശം നൽകി. വിഷയത്തില് അനാവശ്യ പ്രസ്താവനകള് ഒഴിവാക്കണമെന്നും രാജ്യത്ത് മതസൗഹാര്ദം ശക്തമാക്കാന് ആവശ്യമായ പ്രവര്ത്തനങ്ങളുടെ ഭാഗമാവണമെന്നും ആണ് പ്രധാനമന്ത്രിയുടെ നിർദേശം.
വിജയത്തിന്റെയും പരാജയത്തിന്റെയും വീക്ഷണ കോണിലൂടെ അയോധ്യ വിധിയെ നോക്കിക്കാണരുതെന്നും മോദി ഓര്മിപ്പിച്ചു. കഴിഞ്ഞ ദിവസം നടന്ന മന്ത്രിസഭ യോഗത്തില് വെച്ചാണ് പ്രധാനമന്ത്രി ഈ നിര്ദേശം നല്കിയത്. നവംബര് 17 ന് സുപ്രീം കോടതി ചീഫ് ജസ്റ്റിസ് രഞ്ജന് ഗോഗോയ് വിരമിക്കുന്നതിനാല് അതിന് മുന്പായി അയോധ്യ കേസിലെ വിധി പ്രസ്താവിക്കുമെന്നാണ് സൂചന.
