കോഴിക്കോട്: വാഹനാപകടത്തിൽ പരിക്കേറ്റ് ചികിത്സയിലുള്ള പ്രമുഖ അഭിഭാഷകനും, ബിജെപി നേതാവും, എഴുത്തുകാരനുമായ ശങ്കു ടി ദാസിന്റെ ആരോഗ്യനിലയിൽ ആശങ്ക വേണ്ടെന്ന് സന്ദീപ് വാര്യർ. ശങ്കുവിന് ഹെഡ് ഇഞ്ചുറിയില്ലെന്നും, കരളിനേറ്റ പരിക്ക് മൂലമുള്ള രക്തസ്രാവം തടയാനുള്ള ശ്രമം തുടരുന്നുവെന്നും, വേറെ കുഴപ്പമൊന്നുമില്ലെന്നും ഫേസ്ബുക്ക് പോസ്റ്റിലൂടെ അദ്ദേഹം അറിയിച്ചു. ശങ്കുവിന്റെ ആരോഗ്യസ്ഥിതിയറിയാൻ നൂറുകണക്കിന് പേരാണ് വിളിക്കുന്നതെന്നും എല്ലാ ഫോണുകളും അറ്റൻഡ് ചെയ്യാൻ കഴിയാത്ത സാഹചര്യത്തിലാണ് പോസ്റ്റെന്നും അദ്ദേഹം അറിയിച്ചിട്ടുണ്ട്.
ഇന്നലെ രാത്രി 11 മണിക്ക് ശേഷം മലപ്പുറം ചമ്രവട്ടം പാലത്തിനു സമീപം പെരുന്താണിയിൽ വച്ചാണ് ശങ്കു സഞ്ചരിച്ചിരുന്ന വാഹനം അപകടത്തിൽപെട്ടത്. അദ്ദേഹത്തിന്റെ ഓഫിസിൽ നിന്ന് വീട്ടിലേക്ക് മടങ്ങുമ്പോഴാണ് അപകടം. വഴിയാത്രക്കാരാണ് അപകടത്തിൽപ്പെട്ട ശങ്കുവിനെ ആദ്യം ആശുപത്രിയിലെത്തിച്ചത് എന്നാണ് വിവരം. ഇപ്പോൾ അദ്ദേഹം കോഴിക്കോട് ഒരു സ്വകാര്യ ആശുപത്രിയിൽ ചികിത്സയിലാണ്.
ബിജെപി നേതാവ് സന്ദീപ് വാര്യർ തനിക്കെതിരെ മാതൃഭൂമി ചാനൽ പ്രസിദ്ധീകരിച്ച അപകീർത്തികരമായ ഒരു റിപ്പോർട്ടിനെതിരെ നിയമ നടപടി സ്വീകരിക്കാൻ അഡ്വ ശങ്കു ടി ദാസിനെയാണ് ചുമതലപ്പെടുത്തിയിരുന്നത്. ഇത് ശങ്കു ടി ദാസ് സ്ഥിരീകരിക്കുകയും റിപ്പോർട്ട് പിൻവലിച്ച് ചാനൽ ഉടൻ മാപ്പ് പറയുകയും ചെയ്തില്ലെങ്കിൽ വക്കീൽ നോട്ടീസയക്കുമെന്നും അറിയിച്ചിരുന്നു. അപകട വിവരം അറിഞ്ഞതുമുതൽ സന്ദീപ് വാര്യർ ശങ്കുവിനൊപ്പം കോഴിക്കോട് ആശുപത്രിയിലുണ്ട്. അദ്ദേഹത്തിന്റെ ആരോഗ്യനിലയിൽ നേരിയ പുരോഗതിയുണ്ടെന്നാണ് ആശുപത്രി വൃത്തങ്ങളിൽ നിന്നുള്ള സൂചന