Sunday, February 25, 2024
spot_img

നോർത്ത് ഈസ്റ്റിനെ കശക്കിയെറിഞ്ഞ് കൊച്ചിയിൽ ബ്ലാസ്റ്റേഴ്‌സ്;
പ്ലേഓഫ് സാധ്യതകൾ സജീവമാക്കി; പോയിന്റ് ടേബിളിൽ മൂന്നാമത്

കൊച്ചി : തുടര്‍ തോൽവികൾക്കുശേഷം സ്വന്തം കാണികളുടെ മുന്നിൽ കേരള ബ്ലാസ്റ്റേഴ്‌സിന് വിജയം. ഇന്ന് നടന്ന മത്സരത്തില്‍ എതിരില്ലാത്ത രണ്ടുഗോളുകള്‍ക്ക് നോര്‍ത്ത്ഈസ്റ്റ് യുണൈറ്റഡിനെ പരാജയപ്പെടുത്തിയത് . സ്റ്റാർ സ്‌ട്രൈക്കര്‍ ദിമിത്രിയോസ് ഡയമന്റക്കോസിന്റെ ഇരട്ടഗോളുകളാണ് ബ്ലാസ്റ്റേഴ്‌സിനെ വിജയത്തിലെത്തിച്ചത്. ജയത്തോടെ പോയന്റ് പട്ടികയില്‍ മൂന്നാമതെത്തിയ ബ്ലാസ്റ്റേഴ്‌സ് പ്ലേഓഫ് സാധ്യതകള്‍ സജീവമാക്കി.

ആദ്യ പകുതി അവസാനിക്കാന്‍ മിനിട്ടുകൾ മാത്രം ബാക്കിനില്‍ക്കേ ലീഡെടുത്തു. 42-ാം മിനിറ്റില്‍ ദിമിത്രിയോസ് ഡയമന്റക്കോസാണ് ബ്ലാസ്റ്റേഴ്‌സിനായി വലകുലുക്കിയത്. ഇടതുവിങ്ങില്‍ നിന്ന് ബ്രൈസ് മിറിന്‍ഡ നല്‍കിയ ക്രോസില്‍ ഹെഡറിലൂടെയാണ് ഡയമന്റക്കോസ് മത്സരത്തിലെ ബ്ലാസ്റ്റേഴ്‌സിന്റെ ആദ്യ ഗോള്‍ നേടിയത്. പിന്നാലെ 44-ാം മിനിറ്റില്‍ ഡയമന്റക്കോസിലൂടെ ബ്ലാസ്‌റ്റേഴ്‌സിന്റെ രണ്ടാം ഗോളുമെത്തി. മൈതാനമധ്യത്തുനിന്ന് നോര്‍ത്ത്ഈസ്റ്റ് പ്രതിരോധതാരങ്ങളെ കബളിപ്പിച്ച് അഡ്രിയാന്‍ ലൂണ നല്‍കിയ പാസ് ഡയമന്റക്കോസ് അനായാസം ലക്ഷ്യത്തിലെത്തിച്ചു . ആദ്യപകുതി രണ്ടുഗോളുകള്‍ക്ക് ബ്ലാസ്‌റ്റേഴ്‌സ് മുന്നിട്ടുനിന്നു. രണ്ടാം പകുതിയിലും ആക്രമണം മുറപോലെ നടന്നെങ്കിലും ഗോൾ അകന്നു നിന്നു.

Related Articles

Latest Articles