ബേപ്പൂര്: ജലമേളയില് തുഴയല് മത്സരത്തിനിടെ തോണികള് തമ്മിൽ കൂട്ടിയിടിച്ചു. അപകടത്തിൽ പുഴയില് മുങ്ങിയ ആളെ രക്ഷപ്പെടുത്തി. തോണി തുഴയല് ഫൈനല് റൗണ്ട് മത്സരം കഴിഞ്ഞദിവസം വൈകീട്ട് മറീന ജെട്ടി ഭാഗത്ത് നടക്കുമ്ബോഴാണ് തോണികള് തമ്മില് കൂട്ടിയിടിച്ച് അപകടമുണ്ടാവുകയും രണ്ടുപേര് മുങ്ങുകയും ചെയ്തത്. മുങ്ങിയ ഒരാള് തൊട്ടടുത്ത തോണിയിലേക്ക് നീന്തിക്കയറിയെങ്കിലും രണ്ടാമന് തോണിയില് കയറാനാവാതെ ക്ഷീണിതനായി ഒഴുക്കില്പ്പെടുകയായിരുന്നു.
ഈ സമയം കപ്പല് ചാലില് എന്ജിന് ഘടിപ്പിച്ച ഡിങ്കിയുമായി സുരക്ഷ ജോലിയിലുണ്ടായിരുന്ന അസിസ്റ്റന്റ് സ്റ്റേഷന് ഓഫിസര് വി.കെ. ബിജുവിന്റെ നേതൃത്വത്തിലുള്ള അഗ്നിശമന സേനാംഗങ്ങള് സംഭവ സ്ഥലത്തേക്ക് കുതിക്കുകയും അപകടാവസ്ഥയിലായ ആളെ രക്ഷപ്പെടുത്തുകയുമായിരുന്നു. മീഞ്ചന്ത അഗ്നിരക്ഷ നിലയത്തിലെ ശിഹാബുദ്ദീന്, വെള്ളിമാട്കുന്ന് നിലയത്തിലെ ഫയര് ആന്ഡ് റെസ്ക്യൂ ഓഫിസര് സി.ഷിജു, മുക്കം നിലയത്തിലെ അഖില് എന്നിവര് ചേര്ന്ന് ഡിങ്കിയില് കയറ്റിയാണ് രക്ഷപ്പെടുത്തിയത്.
