കൊൽക്കത്ത: പശ്ചിമ ബംഗാളിൽ സ്‌കൂളിനുള്ളിൽ ബോംബ് സ്‌ഫോടനം. നോർത്ത് 24 പർഗനാസ് ജില്ലയിലെ ടിറ്റഗഡിലെ സ്‌കൂളിലായിരുന്നു സംഭവം. സ്‌ഫോടനത്തിൽ ആളപായമില്ലെന്നാണ് പ്രാഥമിക വിവരം.
ടിറ്റഗാഡ് ഫ്രീ ഇന്ത്യ ഹൈസ്‌കൂളിൽ ആയിരുന്നു സ്‌ഫോടനം ഉണ്ടായത്. ഉച്ചയോടെയായിരുന്നു സംഭവം. വരാന്തയിലായിരുന്നു സ്‌ഫോടനം ഉണ്ടായത്. സംഭവ സമയം വിദ്യാർത്ഥികൾ എല്ലാവരും ക്ലാസിനുള്ളിലായിരുന്നതിനാൽ വൻ ദുരന്തമാണ് ഒഴിവായത്. സ്‌ഫോടനത്തിൽ കെട്ടിടത്തിന്റെ തറയ്‌ക്കും ചുവരിനും കേടുപാടുകൾ സംഭവിച്ചിട്ടുണ്ട്.
സംഭവത്തിൽ പോലീസ് അന്വേഷണം ആരംഭിച്ചു. വിവരം അറിഞ്ഞ് ഡെപ്യൂട്ടി പോലീസ് കമ്മീഷണറും സംഘവും സ്‌കൂളിൽ എത്തി പരിശോധന നടത്തി. സംഭവത്തിന്റെ നടുക്കത്തിലാണ് അദ്ധ്യാപകരും വിദ്യാർത്ഥികളും.
