തൃശ്ശൂര്‍ : ഹെല്‍മെറ്റ് വെച്ചില്ലെന്നാരോപിച്ച് മലപ്പുറം ട്രാഫിക് പോലീസ്, തൃശ്ശൂരിലെ കാറുടമയ്ക്ക് 500 രൂപ പിഴയടയ്ക്കാൻ നോട്ടീസ് അയച്ചുവെന്ന് പരാതി. വാഹന നമ്പറില്‍വന്ന ചെറിയ പിഴവാണ് മോട്ടോര്‍ സൈക്കിള്‍ ഉടമയ്ക്കു പകരം കാറുടമയ്ക്ക് നോട്ടീസ് വരാന്‍ കാരണം. നമ്പര്‍ തെറ്റിവന്നതാണെന്ന് പറയാന്‍ വാഹന ഉടമകള്‍ക്ക് അവസരമില്ലാത്തതിനാല്‍ നിയമ ലംഘനം നടത്തിയിട്ടില്ലെങ്കിലും ഓഫീസിലും കോടതിയിലും കയറിയിറങ്ങേണ്ടി വരുന്ന അവസ്ഥയിലാണ് ഇവർ.
ജില്ലയ്ക്ക് പുറത്ത് കൊണ്ടുപോവാത്ത കാറിന് മലപ്പുറത്തുനിന്ന് പിഴ ചലാന്‍ വന്നതോടെ കാറുടമ മോട്ടോര്‍ വാഹനവകുപ്പിന്റെ പരിവാഹന്‍ സൈറ്റില്‍ പരിശോധിച്ചപ്പോഴാണ് നമ്പറിലെ പിഴവ് തിരിച്ചറിഞ്ഞത്. കെ.എല്‍. 45-8880 ആണ് കാറിന്റെ നമ്പര്‍. കെ.എല്‍. 45 എച്ച് 8880 ആണ് മോട്ടോര്‍ സൈക്കിളിന്റേത്. പിഴവ് വ്യക്തമായതോടെ പിഴയടക്കാതിരുന്ന കാറുടമയുടെ നമ്പറിലേക്ക് കഴിഞ്ഞ നവംബറിൽ നടന്ന സംഭവത്തില്‍ പിഴയടക്കാത്ത സാഹചര്യത്തില്‍ കോടതിയിലേക്ക് വിട്ടതായായി, കഴിഞ്ഞ ദിവസം വീണ്ടും മോട്ടോര്‍ വാഹനവകുപ്പിന്റെ സന്ദേശമെത്തിയിട്ടുണ്ട്.
