കോട്ടയം: കെ-റെയിലിനെതിരെ രൂക്ഷ വിമർശനവുമായി ചങ്ങനാശേരി അതിരൂപതാ ആര്‍ച്ച് ബിഷപ്പ് മാര്‍ ജോസഫ് പെരുന്തോട്ടം. സർക്കാർ ജനങ്ങളുടെ പ്രതിഷേധം അധികാരവും ശക്തിയും ഉപയോഗിച്ച് അടിച്ചമര്‍ത്തുകയാണെന്ന് അദ്ദേഹം വിമര്‍ശിച്ചു. ദീപിക ദിനപത്രത്തിനായി എഴുതി നൽകിയ ലേഖനത്തിലായിരുന്നു വിയോജിപ്പ് രേഖപ്പെടുത്തിയത്.
കെ-റെയിലിന്റെ മറവിലെ രാഷ്ട്രീയ ലാഭം മാത്രമാണ് സര്‍ക്കാരിന്റെ ലക്ഷ്യം, ജനങ്ങളുടെ പ്രതിഷേങ്ങള്‍ക്കുനേരെയുള്ള സര്‍ക്കാരിന്റെ പ്രതികരണങ്ങളാണ് ഇത്രയും പ്രശ്നങ്ങൾ ഉണ്ടാക്കുന്നതെന്നും അദ്ദേഹം പറഞ്ഞു. ജനങ്ങളെ ദ്രോഹിച്ചു കൊണ്ട് പദ്ധതിയുമായി എത്രനാള്‍ മുന്നോട്ടുപോകനാകുമെന്നും ലേഖനത്തില്‍ ചോദിക്കുന്നു.
പദ്ധതിയുമായി മുന്നോട്ടുപോകുമ്പോള്‍ ദോഷഫലങ്ങള്‍ അനുഭവിക്കേണ്ടി വരുന്നത് സാധാരണ ജനങ്ങളാണ്. പദ്ധതിയുടെ ഇരകളെ നേരിട്ടുകണ്ട് കാര്യങ്ങൾ മനസ്സിലാക്കുന്നതിനും, പ്രശ്നങ്ങൾ മനസ്സിലാക്കുന്നതിനും മതസമുദായ നേതാക്കൾ സന്ദർശിക്കുമ്പോൾ അതിലും രാഷ്ട്രീയം കണ്ടെത്താൻ ശ്രമിക്കുന്നത് പ്രതിഷേധാർഹമാണെന്ന് അദ്ദേഹം തന്റെ ലേഖനത്തിൽ പറഞ്ഞു. സർക്കാർ ജനാധിപത്യ മര്യാദകൾ പാലിച്ചുകൊണ്ട്, പ്രശ്ന പരിഹാരം കാണണമെന്നും, സമാധാനാന്തരീക്ഷത്തിൽ ജനങ്ങളുടെ ജീവനും സ്വത്തും സംരക്ഷിക്കാൻ തയ്യാറാകണമെന്നും ബിഷപ്പ് അഭിപ്രായപ്പെട്ടു.
