തിരുവനന്തപുരം: മുഖ്യമന്ത്രിയുടെ മകള്ക്കും മുഖ്യമന്ത്രിയുമായി ബന്ധപ്പെട്ട മറ്റൊരാള്ക്കും വിദേശത്തുള്ള ജോയിന്റ് അക്കൗണ്ടിലേക്ക് പ്രൈസ് വാട്ടര് കൂപ്പേഴ്സ്, എസ്.എന്.സി ലാവലിന് ഉള്പ്പെടെയുള്ള കമ്പനികളില്നിന്ന് പണം വന്നെന്ന ആരോപണം ഞെട്ടിക്കുന്നതാണെന്ന് പ്രതിപക്ഷ നേതാവ് വി.ഡി. സതീശൻ. ഇങ്ങനെയൊരു അക്കൗണ്ട് ഉണ്ടോയെന്നും കമ്പനികളില്നിന്ന് പണം വന്നിട്ടുണ്ടോയെന്നും മുഖ്യമന്ത്രി വ്യക്തമാക്കണമെന്നും സതീശൻ പറഞ്ഞു.
മുഖ്യമന്ത്രി സ്ഥാനത്തിരിക്കുമ്പോള് മകളുടെയും അദ്ദേഹവുമായി ബന്ധപ്പെട്ട ആളുടെയും പേരിലുള്ള ജോയിന്റ് അക്കൗണ്ടിലേക്ക് പണം വന്നിട്ടുണ്ടെങ്കില് അത് ഗുരുതരമായ കാര്യമാണ്. ഇത് ശരിയാണോയെന്ന് പറയാനുള്ള ഉത്തരവാദിത്വം മുഖ്യമന്ത്രിക്കുണ്ട്. ആരോപണം തെറ്റാണെങ്കില് ഉന്നയിച്ചവര്ക്കെതിരെ നിയമനടപടികള് സ്വീകരിക്കണം, സതീശൻ ആവശ്യപ്പെട്ടു.
ആരോപണംവന്നാല് മൗനത്തിന്റെ മാളത്തില് ഒളിക്കുകയെന്നതാണ് മുഖ്യമന്ത്രിയുടെ പതിവ് രീതി. ഇക്കാര്യത്തിലും അങ്ങനെ ചെയ്താല് ആരോപണം ശരിയാണെന്ന് വരും. ഈ ആരോപണത്തിന് മുഖ്യമന്ത്രി മറുപടി പറയണം. മുഖ്യമന്ത്രി നിഷേധിച്ചാല് ഇതേക്കുറിച്ചുള്ള ബാക്കി വിവരങ്ങള് പറയാമെന്നും സതീശൻ പറഞ്ഞു.
