തിരുവനന്തപുരം; സ്വര്ണക്കടത്ത് കേസിലെ പ്രതി സ്വപ്ന സുരേഷിന്റെ വെളിപ്പെടുത്തലുമായി ബന്ധപ്പെട്ട് നിയമസഭയില് വസ്തുതാ വിരുദ്ധമായ കാര്യം പറഞ്ഞ് സഭയെയും സാമാജികരെയും തെറ്റിദ്ധരിപ്പിച്ച മുഖ്യമന്തിക്കെതിരെ അവകാശ ലംഘനത്തിനു നടപടി സ്വീകരിക്കണമെന്ന് ആവശ്യപ്പെട്ട് മാത്യു കുഴല്നാടന് എം.എല്.എ സ്പീക്കര്ക്ക് നോട്ടീസ് നല്കി. നിയമസഭയുടെ നടപടിക്രമങ്ങളും കാര്യനിര്വ്വഹണവും സംബന്ധിച്ച ചട്ടം 154 പ്രകാരമാണ് നോട്ടീസ് നൽകിയത്.
പിണറായി വിജയൻറെ മകള് വീണ വിജയന്റെ ഉടമസ്ഥതയിലുള്ള കമ്പനിയുടെ വെബ്സൈറ്റില് പ്രൈസ് വാട്ടര് ഹൗസ് കൂപ്പേര്സ് സ്ഥാപനത്തിന്റെ ഡയറക്ടര് ജെയ്ക് ബാലകുമാര് അവരുടെ മെന്റ്റര് ആണെന്ന് പറഞ്ഞിരുന്നത് മാത്യു കുഴല്നാടന് സഭയുടെ ശ്രദ്ധയില് കൊണ്ടുവന്നിരുന്നു. എന്നാല് അടിയന്തര പ്രമേയ ചര്ച്ചക്ക് മറുപടി പറഞ്ഞ മുഖ്യമന്ത്രി ‘മാത്യു കുഴല് നാടന് പറഞ്ഞത് പച്ചക്കള്ളമാണെന്ന് പ്രതികരിച്ചിരുന്നു. ആ പ്രതികരണത്തിനെതിരെ മാത്യു കുഴൽ നാടൻ മറുപടിയും നൽകി.