കൊട്ടാരക്കര : എംസി റോഡിൽ ലോറിക്കടിയിൽപ്പെട്ട് ദാരുണമായി മരിച്ച യുവാവിന്റെ മൃതദേഹം തിരക്കേറിയ റോഡരികില്‍ ആരും കാണാതെ കിടന്നത് നീണ്ട ഒന്‍പതുമണിക്കൂര്‍. വെട്ടിക്കവല പച്ചൂർ സ്വദേശി രതീഷാണ് അപകടത്തിൽ മരിച്ചത്. അപകടത്തിന് തൊട്ടു പിന്നാലെ ലോറി കയറിയിറങ്ങിയ രതീഷിനെ റോഡരികിലേക്ക് മാറ്റിയിട്ട ശേഷം ലോറി ഡ്രൈവര്‍ ലോറിയുമായി കടന്നുകളയുകയായിരുന്നു. ലോറി ഡ്രൈവര്‍ തക്കല സ്വദേശി കൃഷ്ണകുമാറിനെ കൊട്ടാരക്കര പൊലീസ് അറസ്റ്റ് ചെയ്തു.
ഇന്നലെ രാത്രി പതിനൊന്നരയ്ക്കാണ് അപകടം നടന്നത്. തമിഴ്നാട്ടിൽ നിന്ന് വാഴവിത്തുമായി എത്തിയ ലോറി സദാനന്ദപുരത്തെ കടയിൽ വാഴവിത്തിറക്കിയ ശേഷം മുന്നോട്ടെടുത്തപ്പോള്‍ വഴിയില്‍ കിടക്കുകയായിരുന്ന രതീഷ് ലോറിക്കടിയിലാകുകയായിരുന്നു. എന്തോ ലോറിക്കടിയിലായി എന്ന് മനസിലായ ഡ്രൈവര്‍ ലോറി നിർത്തുകയും ശേഷം ലോറിയിൽ നിന്നിറങ്ങി നോക്കിയപ്പോഴാണ് റോഡില്‍ കിടക്കുന്ന യുവാവിനെ കണ്ടത്. എന്നാൽ യുവാവിനെ എത്രയും വേഗം ആശുപത്രിയിൽ എത്തിക്കുന്നതിന് പകരം യുവാവിനെ റോഡരികിലേക്ക് മാറ്റി കിടത്തിയ ശേഷം ഡ്രൈവർ സംഭവസ്ഥലത്തുനിന്ന് ലോറിയുമായി കടന്നുകളഞ്ഞു.
ഇന്ന് രാവിലെ സ്ഥലത്തെത്തിയവരാണ് പൊലീസിനെ വിവരം അറിയിച്ചത്. സിസിടിവി ദൃശ്യങ്ങളുടെ സഹായത്തോടെയാണ് പ്രതിയെ തിരിച്ചറിഞ്ഞത് .അപകടമുണ്ടാക്കിയ ലോറി പുത്തൂരില്‍ നിന്ന് പിടികൂടി.
