അദ്ധ്യാപികയ്‌ക്ക് പെട്രോൾപമ്പിലെ ശൗചാലയം തുറന്നു നൽകാൻ വൈകിയ പമ്പുടമയ്ക്ക് 1,65,000 രൂപ പിഴ വിധിച്ച് പത്തനംതിട്ട ഉപഭോക്തൃ തർക്കപരിഹാര കമ്മിഷൻ. 1,50,000 രൂപ നഷ്ട‌പരിഹാരവും 15,000 രൂപ കോടതിച്ചെലവും ചേർത്താണ് 1,65,000 രൂപ പരാതിക്കാരിക്ക് നൽകേണ്ടത്. ഏഴംകുളം ഊരകത്ത് ഇല്ലം വീട്ടിൽ സി.എൽ. ജയകുമാരിയുടെ ഹർജിയിലാണ് വിധി പറഞ്ഞത്. കോഴിക്കോട് പയ്യോളിയിലുള്ള തെനംകാലിൽ പെട്രോൾ പമ്പ് ഉടമ ഫാത്തിമ ഹന്നയാണ് നഷ്ടപരിഹാരം നൽകേണ്ടത്.
2024 മേയ് ഏട്ടിനാണ് കേസിനാസ്പദമായ സംഭവം നടന്നത്. രാത്രി 11-ന് കാർ യാത്രക്കിടയിൽ പരാതിക്കാരി പയ്യോളിയിലെ പമ്പിൽ പെട്രോൾ അടിക്കാൻ കയറിയപ്പോൾ ശൗചാലയം പൂട്ടിക്കിടക്കുകയായിരുന്നു. താക്കോൽ ആവശ്യപ്പെട്ടപ്പോൾ സ്റ്റാഫ് പരുഷമായി സംസാരിക്കുകയും താക്കോൽ മാനേജരുടെ പക്കലാണെന്നും അറിയിക്കുകയും . അറിയിച്ചു. ഇതിനെത്തുടർന്ന് ഡീലറുടെയും മാനേജറുടെയും ഫോണിൽ ബന്ധപ്പെട്ടെങ്കിലും ഫോൺ എടുത്തില്ല. തുടർന്ന് പയ്യോളി സ്റ്റേഷനിൽ വിളിച്ചതിനെത്തുടർന്ന് പോലീസെത്തി ശൗചാലയം ബലമായി തുറന്നുനൽകുകയായിരുന്നു. തുടർന്ന് പോലീസിൽ പരാതി നൽകുകയും ചെയ്തു. പോലീസിന്റെയും നിർദേശത്തിന്റെ അടിസ്ഥാനത്തിൽ ഉപഭോക്തൃ കോടതിയിലും പരാതി നൽകുകയായിരുന്നു.
