ലണ്ടൻ: ഒരുകാലത്ത് ഇന്ത്യയെ അടക്കിഭരിച്ചിരുന്ന ഈസ്റ്റ് ഇന്ത്യ കമ്പനി രണ്ടാം തവണയും അടച്ചുപൂട്ടലിലേക്ക് നീങ്ങുന്നു. 2010-ൽ ഇന്ത്യൻ വംശജനായ സഞ്ജീവ് മേത്ത പുനരുജ്ജീവിപ്പിച്ച കമ്പനിയാണ് ഭീമമായ കടബാധ്യതയെത്തുടർന്ന് ഇപ്പോൾ ലിക്വിഡേഷൻ നടപടികളിലേക്ക് കടന്നിരിക്കുന്നത്.
ഏകദേശം 10.5 കോടി രൂപയിലധികം കടബാധ്യതയെത്തുടർന്നാണ് കമ്പനി ആസ്തികൾ വിൽക്കുന്ന നടപടിയിലേക്ക് നീങ്ങിയത്.ബ്രിട്ടീഷ് സർക്കാരിന് നികുതിയിനത്തിൽ 2.03 കോടി രൂപയും, ജീവനക്കാർക്ക് ശമ്പള കുടിശ്ശികയായി 1.71 കോടി രൂപയും കമ്പനി നൽകാനുണ്ട്.ലണ്ടനിലെ മെയ്ഫെയറിലുള്ള കമ്പനിയുടെ പ്രധാന ലക്ഷ്വറി സ്റ്റോർ ഇതിനോടകം അടച്ചുപൂട്ടുകയും കെട്ടിടം ഒഴിഞ്ഞുനൽകുകയും ചെയ്തു. കമ്പനിയുടെ ഔദ്യോഗിക വെബ്‌സൈറ്റും ഇപ്പോൾ പ്രവർത്തനരഹിതമാണ്.
അനുബന്ധ സ്ഥാപനമായ ‘ഈസ്റ്റ് ഇന്ത്യ കമ്പനി കളക്ഷൻസ് ലിമിറ്റഡിനെതിരെ’ കടക്കാർ കോടതിയിൽ വൈൻഡിംഗ്-അപ്പ് പെറ്റീഷൻ ഫയൽ ചെയ്തിട്ടുണ്ട്.
1600-ൽ സ്ഥാപിതമായ യഥാർത്ഥ ഈസ്റ്റ് ഇന്ത്യ കമ്പനി 1874-ലാണ് ബ്രിട്ടീഷ് സർക്കാർ നിർത്തലാക്കിയത്. 2010-ൽ സഞ്ജീവ് മേത്ത ഈ ബ്രാൻഡ് നാമം സ്വന്തമാക്കിയപ്പോൾ, “ഇന്ത്യ ഭരിച്ചിരുന്ന കമ്പനിയെ ഒരു ഇന്ത്യൻ വംശജൻ ഏറ്റെടുത്തത്” വലിയ വാർത്തയായിരുന്നു. ഉന്നത നിലവാരമുള്ള ചായ, ചോക്കലേറ്റുകൾ, സുഗന്ധവ്യഞ്ജനങ്ങൾ എന്നിവയായിരുന്നു കമ്പനി പ്രധാനമായും വിപണിയിൽ എത്തിച്ചിരുന്നത്.
